मिठी नदीच्या परिसरात कचरा आणून टाकणाऱ्यांवर पालिकेची कारवाई

मिठी नदी परिसरात कचरा टाकणाऱ्यांवर पालिकेची कारवाई
सकाळ वृत्तसेवा
मुंबई, ता. १ : खार येथून साकीनाका येथील मिठी नदी परिसरातील कचरापेटीबाहेर गेल्या ३० आणि ३१ जुलैच्या रात्री मोठ्या प्रमाणात कचरा आणून टाकणाऱ्या  ‘द गौरव कॅटरर्स’वर कुर्ला ‘एल’ विभागाकडून १० हजार रुपयांची दंडात्मक कारवाई करण्यात आली आहे. तसेच, एका ठिकाणचा कचरा अशाप्रकारे इतरत्र नेऊन  टाकणाऱ्या एकूण सात आस्थापनांकडून १२ जूनपासून आतापर्यंत ६५ हजार रुपयांचा दंड ठोठावण्यात आला आहे.
मोठ्या प्रमाणात कचरानिर्मिती करणाऱ्या आणि तो कचरा रात्री-अपरात्री इतर भागांमध्ये नेऊन टाकणारे व्यक्ती, व्यावसायिक, कंत्राटदार तसेच आस्थापनांविरोधात कठोर कारवाई करण्यासाठी पथक नेमण्याचे निर्देश अतिरिक्त पालिका आयुक्त (शहर) डॉ. अश्विनी जोशी यांनी दिले आहेत. त्या अनुषंगाने पालिकेने ही कारवाई सुरू केली आहे.
खार येथील ‘द गौरव कॅटरर्स’विरोधात शुक्रवारी (ता. १) कारवाई करण्यात आली. ‘द गौरव कॅटरर्स’कडून मोठ्या प्रमाणात उर्वरित अन्नपदार्थ रात्रीदरम्यान साकीनाका येथील मिठी नदी परिसरातील कचरापेटीबाहेर टाकण्यात आला होता. याची दखल घेऊन ‘द गौरव कॅटरर्स’च्या कार्यालयात प्रत्यक्ष जाऊन त्यांना १० हजार रुपयांचा दंड ठोठावण्यात आला.

सात आस्थापनांकडून ६५ हजार रुपयांचा दंड
घोडबंदर मार्ग, ठाणे येथील आयडीएफसी बँक लिमिटेड यांनी कचरा मुंबईच्या हद्दीत टाकला होता. तसेच मरोळ येथील अशोक टॉवर गृहनिर्माण संस्था, विक्रोळी (पश्चिम) येथील एचडीएफसी बँक, कुर्ला येथील टॅक्सीमॅन तसेच सिमरन गृहनिर्माण संस्था, ब्राह्मणवाडी येथील गोदावरी गृहनिर्माण संस्था, इम्तियाज लाइन डेपो यांनी कचरा इतरत्र टाकल्याचे आढळून आले आहे. या आस्थापनांना रीतसर नोटीस बजावत दंड ठोठावण्यात आला असल्याची माहिती पालिकेने दिली.