पालिकेच्या बँक निवडणुकीचा राजकीय आखाडा

पालिकेच्या बँक निवडणुकीचा राजकीय आखाडा
सदावर्ते-कडू यांचे पॅनल आमने-सामने, २१ ऑगस्टला निवडणूक
सकाळ वृत्तसेवा
मुंबई, ता. १ : मुंबई महापालिका कर्मचाऱ्यांसाठी असलेल्या ‘दि म्युनिसिपल को-ऑपरेटिव्ह बँक लिमिटेड’च्या पंचवार्षिक निवडणुकीत यंदा प्रथमच राजकीय रंग आला आहे. ॲड. गुणरत्न सदावर्ते आणि प्रहार जनशक्ती पक्षाचे अध्यक्ष व माजी राज्यमंत्री बच्चू कडू यांची पॅनेल्स निवडणुकीच्या रिंगणात उतरली आहेत. त्यामुळे यंदाची ही निवडणूक केवळ कर्मचाऱ्यांपुरती मर्यादित राहिली नसल्याची चर्चा रंगली आहे. बॅंकेची ही निवडणूक गुरुवारी (ता. २१) होत असून, सध्या प्रचाराला जोरदार रंग चढला आहे. ‘जय महाराष्ट्र सहकार पॅनेल’ (बच्चू कडू), ‘सदावर्ते कष्टकरी पॅनेल’ (गुणरत्न सदावर्ते) आणि ‘जय सहकार पॅनेल’ (प्रदीप सावंत) अशी प्रमुख पॅनेल्स मैदानात आहेत.
या निवडणुकीत ‘जय महाराष्ट्र सहकार पॅनेल’ (बच्चू कडू), यांचे पॅनेल व ॲड. गुणरत्न सदावर्ते यांचे ‘सदावर्ते कष्टकरी पॅनेल’ हे या निवडणुकीत पहिल्यांदाच निवडणूक मैदानात उतरले आहे. यातील जय महाराष्ट्र सहकार पॅनेलचे विकास घुगे यांनी बँकेत चाललेल्या कथित भ्रष्टाचाराविरोधात लढण्याचा निर्धार व्यक्त केला आहे. ते प्रहार शिक्षक संघटनेचे अध्यक्ष आहेत. तीन वेळा निवडून आलेले जय सहकार पॅनेलचे उमेदवार प्रदीप सावंत हेही यंदा निवडणूक रिंगणात असल्याचे सांगण्यात आले. दरम्यान, सामान्यतः चर्चेबाहेर राहणारी ही निवडणूक यंदा राजकीय नेत्यांच्या सहभागामुळे लक्षवेधी ठरत असून, अंतिम लढत कुणामध्ये होणार, याकडे सर्वांचे लक्ष लागले आहे.
..............
साडेचार हजार कोटींची उलाढाल
मुंबई महापालिकेच्या कर्मचाऱ्यांच्या या सहकारी बॅंकेची एकूण उलाढाल सुमारे साडेचार हजार कोटी रुपयांची आहे. २२ शाखा आणि ६० हजारांहून अधिक सभासद असलेल्या या बॅंकेच्या कारभारासाठी १९ सदस्यांचे संचालक मंडळ असते.