मालमत्ता कर, पाणी देयकासाठी विशेष केंद्र

मालमत्ता कर, पाणी देयकासाठी विशेष केंद्र
महापालिकेचा महत्त्वपूर्ण निर्णय
सकाळ वृत्तसेवा
डोंबिवली, ता. २ : कल्याण-डोंबिवली क्षेत्रातील नागरिकांना आपल्याच परिसरात मालमत्ता कर, पाणी देयक शुल्क भरण्याची सुविधा उपलब्ध व्हावी, यासाठी महापालिकेने नवीन विशेष केंद्रे सुरू केली आहेत. पालिकेच्या मालमत्ता कर विभागाच्या उपायुक्त कांचन गायकवाड यांनी वरिष्ठ अधिकाऱ्यांच्या सूचनेनुसार महत्त्वपूर्ण निर्णय घेतला आहे. कल्याण, डोंबिवली, टिटवाळा आणि २७ गाव परिसरातील विविध भागांमध्ये विशेष नवीन मालमत्ता कर व पाणी देयक भरणा केंद्रांची स्थापना केली आहे.

मालमत्ता कर व पाणी देयक भरायचे असल्यास नागरिकांना पालिकेचे मुख्यालय तसेच डोंबिवलीमधील उपविभागीय कार्यालय गाठावे लागते. केंद्रावर गर्दी असल्यास नागरिकांना रांगेत उभे राहावे लागते. नागरिकांची ही गैरसोय लक्षात घेता तसेच नागरिकांना घराजवळ ही केंद्रे उपलब्ध झाली तर करभरणा वाढेल, हे लक्षात घेत पालिका प्रशासनाने विशेष केंद्रे स्थापन केली आहेत. ही केंद्रे दररोज सकाळी १० ते सायंकाळी पाच या वेळेत सुरू राहणार आहेत. यामुळे नागरिकांना नागरी सुविधा केंद्रांमध्ये जाऊन रांगा लावण्याची गरज भासणार नाही. हे केंद्र प्रभाग पातळीवरील १० नागरी सुविधा केंद्रांव्यतिरिक्त सुरू केले असून, अधिकाधिक कर व पाणीपट्टीची वेळेत वसुली करण्याचा उद्देश यामागे आहे. ज्या नागरिकांना मालमत्ता कर किंवा पाणी देयकाची बिले मिळालेली नाहीत, त्यांनाही या केंद्रांवर ऑनलाइन प्रणालीद्वारे देयक तपासून भरणा करता येणार आहे. दरम्यान, या निर्णयामुळे स्थानिक नागरिकांना त्यांच्या घराजवळच कर व पाणी देयक भरण्याची सुविधा मिळणार असून, वेळ आणि श्रम वाचणार आहेत.

विशेष देयक भरणा केंद्र
अ प्रभाग क्षेत्र - मोहने पूर्व यादवनगर, शांताराम प्राइड सोसायटी, अटाळी विराट चौक, अटाळी कोळीवाडा,
ब प्रभाग क्षेत्र - कल्याण पश्चिम उंबर्डे डी. बी. चौक, मोहन रिजन्सी, बारावे मुंबई विद्यापीठ उपकेद्रासमोर वसंत व्हॅली.
क प्रभाग क्षेत्र - पत्री पुलाजवळ सर्वोदय पार्क.
जे प्रभाग क्षेत्र - नेतिवली, मेट्रो मॉलच्या मागे, मेट्रो मॉल रेसिडेन्सी, लोकग्राम, आत्मारामनगर, नीलगिरी सोसायटी.
ड प्रभाग क्षेत्र - खडेगोळवली विठ्ठल रुक्मिणी मंदिर, कल्याण पूर्व, काटेमानिवली, विश्वास विद्यालयाजवळ जुगनू जाधव कार्यालय.
फ प्रभाग क्षेत्र - डोंबिवली पूर्व ठाकुर्ली ९० फिट रोड, बालाजी आंगण सोसायटी, आगरकर रस्ता रघुनाथ जानकी सोसायटी,
ह प्रभाग क्षेत्र - डोंबिवली पश्चिम घनश्याम गुप्ते रस्त्यावर शिधावाटप दुकानासमोर, स्वामी नारायण सिटी, मोठा गाव, माणकोली पुलाजवळ.
ग प्रभाग क्षत्र - डोंबिवली पूर्व झायका हॉटेलजवळ, पॅसिफिक औरा इमारत.
आय प्रभाग क्षेत्र - कल्याण पूर्व क्लब हाऊस, अनमोल गार्डन कॉम्प्लेक्स.
ई प्रभाग क्षेत्र - डोंबिवली कल्याण शिळ रस्ता कासा रिओ, पलावा सिटी क्लब हाऊस, कासा बेला, क्लब हाऊस, कासा बेला गोल्ड क्लब हाऊस.