प्रामाणिक गणेशोत्सव मंडळांना दिलासा

भाईंदर, ता.२ (बातमीदार) : आगामी गणेशोत्सवासाठी मिरा-भाईंदर महापालिकेकडून सार्वजनिक गणेशोत्सव मंडळांसाठी नियमावली जारी करण्यात आली आहे. त्यात मागील दहा वर्षांत सर्व नियमांचे काटेकोरपणे पालन करणाऱ्या व मंडळाबाबत कोणत्याही तक्रारी नसलेल्या गणेशोत्सव मंडळांना आगामी पाच वर्षांसाठीची परवानगी देण्यात येणार आहे, मात्र त्याचबरोबर काँक्रीट रस्त्यावर मंडप व स्टेज उभारणीसाठी खड्डे खोदण्यास मनाई करण्यात आली असून मंडळाकडून खड्डे खोदाई झाल्यास कायदेशीर कारवाई करण्याचा इशारा महापालिकेकडून देण्यात आला आहे.

सार्वजनिक गणेशोत्सवासाठी मुंबई उच्च न्यायालयाने आखून दिलेल्या मार्गदर्शक तत्वानुसार केवळ नोंदणीकृत गणेश मंडळांनाच मंडप आणि स्टेज उभारणीसाठी महापालिकेकडून परवानगी देण्यात येणार आहे. रस्त्याच्या केवळ एक चतुर्थांश भागातच मंडप उभारण्याची परवानगी असणार आहे व ही परवानगी मोफत असणार आहे. महापालिकेकडे परवानगीसाठी अर्ज देताना सोबत वाहतूक पोलिस, स्थानिक पोलिस, अग्निशमन विभाग यांचे ना हरकत दाखले सादर करणे बंधनकारक करण्यात आले आहेत. जी गणेश मंडळे गेल्या दहा वर्षांपासून सर्व नियमांचे काटेकोरपणे पालन करत आहे, अशा मंडळांना नियमांचे पालन करण्यासाठी प्रोत्साहन मिळावे, यासाठी पाच वर्षांसाठीची परवानगी याच वर्षी देण्याच्या सूचना आयुक्त राधाबिनोद शर्मा यांनी दिल्या आहेत.

सार्वजनिक रस्त्याच्या केवळ एक चतुर्थांश भागातच मंडप उभारणे बंधनकारक आहे, तर आठ फूट अथवा त्यापेक्षा कमी रुंदीच्या रस्त्यांवर मंडप उभारणीसाठी महापालिकेकडून परवानगी देण्यात येणार नसल्याचे स्पष्ट करण्यात आले आहे. मंडप अथवा स्टेज बांधताना काँक्रीट रस्त्यांवर खड्डे खोदण्यास मनाई करण्यात आली आहे. या रस्त्यांवर मंडप बांधताना वाळूच्या पिंपांचा वापर करण्याच्या सल्ला महापालिकेकडून देण्यात आला आहे. या नियमाचे उल्लंघन करणाऱ्यांवर रस्ते अनधिकृत खोदाई केल्याप्रकरणी कायदेशीर कारवाई करण्याचा इशारा महापालिकेकडून देण्यात आला आहे.

झाडांवर विद्युत रोषणाई करण्यास मनाई
उत्सवानिमित्त रस्त्यावर कमानी बांधण्याची परवानगी नाही. मंडळांनी बेकायदा कमानी उभारल्यास अथवा विनापरवानगी मंडप बांधल्यास ते स्थानिक पोलिसांच्या मदतीने काढून टाकण्याचे आदेश आयुक्तांनी प्रभाग अधिकाऱ्यांना दिले आहेत. उत्सवादरम्यान मंडळांकडून झाडांवर अथवा विजेच्या खांबांवर रोषणाई करण्याचे प्रकार घडतात. या प्रकारांना आळा घालण्यासाठी महापालिकेच्या विद्युत विभागाला मंडप तपासणीचे आदेश देण्यात आले आहेत.

पर्यावरणाचे रक्षण
पर्यावरण रक्षणासंदर्भातही महापालिकेकडून सूचना देण्यात आल्या आहेत. केवळ सहा फूटांपेक्षा जास्त उंच असलेल्या मूर्तींचे नैसर्गिक पाण्यात विसर्जन करण्यास उच्च न्यायालयाने परवानगी दिली आहे. यासाठी गणेश मंडळांनी मंडपातील मोठ्या मूर्तींचे विसर्जन करण्याऐवजी मंडपातील प्राणप्रतिष्ठा केलेल्या छोट्या मूर्तीचे कृत्रिम तलावात विसर्जन करावे व मोठ्या मूर्तीचे पुढील वर्षीच्या उत्सवासाठी जतन करावे, असे आवाहान महापालिकेकडून करण्यात आले आहे.

ध्वनी प्रदू्षण केल्यास कारवाई
सार्वजनिक गणेश मंडळांना ध्वनीक्षेपक परवानगी स्थानिक पोलिस ठाण्यातून घ्यावी लागणार आहे. उत्सवादरम्यान ध्वनी प्रदूषण होऊ नये, याची काळजी मंडळाने घ्यायची आहे. ध्वनी प्रदूषणाच्या तक्रारींची नोंद घेण्यासाठी प्रत्येक प्रभाग कार्यालयात व्यवस्था केली जाणार आहे. प्राप्त झालेल्या तक्रारी पुढील कारवाईसाठी त्वरित स्थानिक पोलिस ठाण्यात पाठविण्यात येणार आहेत.