फुल मार्केटच्या एकाच इमारतीमधील दोन बंद घरात चोरी

एकाच इमारतीतील दोन घरांत चोरी
सकाळ वृत्तसेवा
ठाणे, ता. २ ः फूल मार्केटमधील आनंद सरिता सोसायटीत पहिल्या आणि चौथ्या मजल्यावरील दोन बंद घरांत भरदिवसा चोरी झाल्याची घटना समोर आली आहे. एका घरातील कुटुंब सात महिन्यांपूर्वी अमेरिकेला गेलेले आहे. तर दुसऱ्या घरातील तक्रारदार मुलांना शाळेत सोडण्यासाठी गेल्या होत्या. चोरट्यांनी त्यांच्या घरातून ९० हजार रुपये किमतीचे सोन्या-चांदीचे दागिने लांबवल्याचे तक्रारीत नमूद केले आहे.
तक्रारदार पूनम जाधव (४८) या शुक्रवारी (ता. १) दुपारी बाराच्या सुमारास मुलांना शाळेत सोडण्यासाठी सिडको बसथांबा येथे गेल्या होत्या. तेथून त्या राहत्या इमारतीच्या चौथ्या मजल्यावरील जयश्री कदम यांच्याकडे कामानिमित्त गेल्या होत्या. तेथून त्या सव्वादोनच्या सुमारास पहिल्या मजल्यावरील घरी परत येताच, त्यांना घराचा दरवाजा उघडा दिसला. तसेच घरातील कपाटातील सोन्याचे मिनी गंठण, रिंगा, अंगठी, कानातील आणि चांदीचे पैंजण तसेच इतर चांदीच्या वस्तू असा ९० हजारांचा ऐवज चोरी गेल्याचे तक्रारीत नमूद केले आहे. याशिवाय चौथ्या मजल्यावरील रूम ४०१ मध्ये राहणारे कुरुवेल्ला हे कुटुंब सात महिन्यांपूर्वी अमेरिकेला गेले आहे. या घराचा कडी-कोंयडा तोडल्याचे दिसून आले असून याबाबत त्या कुटुंबाला फोन करून माहिती देण्यात आल्याचेही तक्रारीत म्हटले आहे. याप्रकरणी ठाणे नगर पोलिस ठाण्यात गुन्हा दाखल झाला असून पुढील तपास पोलिस निरीक्षक भरत चौधरी यांच्या मार्गदर्शनाखाली सुरू आहे.