गुटख्याचा साठा घेऊन जाणारी दुक्कली गजाआड,

प्रतिबंधित गुटख्यासह दोघे गजाआड
गोठिवलीतून १४ लाख ४० हजारांचा साठा जप्त
नवी मुंबई, ता. २ (वार्ताहर) : मुंबईतून नवी मुंबईमार्गे ठाणे येथे १४ लाख ४० हजारांचा प्रतिबंधित गुटखा रबाळे पोलिसांनी गुरुवारी (ता. ३१) सायंकाळी जप्त केला. या कारवाईत दोघांना अटक करण्यात आली असून तस्करीतील इतरांचा शोध सुरू आहे.
रबाळे येथील गोठिवली गावच्या समोरील रस्त्यावरून एका टेम्पोत महाराष्ट्रात प्रतिबंधित असलेला गुटखा, पानमसाला, तंबाखूजन्य पदार्थ विक्रीसाठी नेला जाणार असल्याची माहिती रबाळे पोलिसांना मिळाली होती. त्याआधारे पोलिसांच्या पथकाने गुरुवारी सायंकाळी सापळा लावला होता. सायंकाळी सहाच्या सुमारास संशयित टेम्पोतून प्रतिबंधित गुटख्याच्या तब्बल २५ गोण्या आढळून आल्या. या वेळी टेम्पोचालक प्रभुनाथ पान्डे (४४) व आसिफ अफताब शेख (२५) ताब्यात घेतले. तसेच १४ लाख ४० हजार रुपये किमतीच्या गुटख्यासह सहा लाखांचा टेम्पोदेखील जप्त करण्यात आला आहे.
---------------------------------
चौघांविरोधात गुन्हा
पोलिसांच्या चौकशीत शेखर अण्णा, अनिल शिंदे या दोघांनी ठाणे घोडबंदर येथे गुटखा वितरित करण्यासाठी दिल्याचे सांगितले. त्यानुसार पोलिसांनी चौघांविरोधात गुन्हा केला असल्याची माहिती वरिष्ठ पोलिस निरीक्षक बाळकृष्ण सावंत यांनी दिली.