राजीव गांधी उड्डाणपुलाखाली अवैध पार्किंग

राजीव गांधी उड्डाणपुलाखाली अवैध पार्किंग
वाहतूक कोंडीने नागरिक त्रस्त; उपाययोजनांची मागणी
नेरूळ, ता. ३ (बातमीदार) ः नेरूळ सेक्टर-२ येथील राजीव गांधी उड्डाणपुलाखालून विविध भागात जाणाऱ्या वाहनांची मोठ्या प्रमाणावर वर्दळ असते, मात्र या उड्डाणपुलाखाली बेकायदा वाहने पार्क केल्याने परिसरात तीव्र वाहतूक कोंडी निर्माण होत आहे. त्यामुळे वाहनचालकांसह पादचाऱ्यांना दररोज मोठ्या त्रासाला सामोरे जावे लागत आहे. विशेष म्हणजे या समस्येकडे वाहतूक पोलिस आणि महापालिका प्रशासनाने दुर्लक्ष केल्याने नागरिकांत संतापाचे वातावरण आहे.
या उड्डाणपुलाखालून जुईनगर, सानपाडा, नेरूळ रेल्वेस्थानक अशा महत्त्वाच्या ठिकाणी जाणाऱ्या वाहनांची सतत वर्दळ असते. पूर्वी येथे फेरीवाल्यांचे मोठ्या प्रमाणावर अतिक्रमण होते. महापालिकेने कारवाई करत ते हटवले, परंतु त्यांनी पुन्हा पदपथ व रस्त्याच्या कडेला व्यवसाय थाटल्याने परिस्थिती फारशी सुधारलेली नाही. त्यातच अनेक वाहनचालक उड्डाणपुलाखाली बिनदिक्‍कत वाहने पार्क करतात. परिणामी निम्म्याहून अधिक रस्ता या अवैध पार्किंगमुळे अडवला जातो.
या पार्किंगमुळे इतर वाहनांना वळणे घेणे कठीण होते, वाहने एकमेकांना अडथळा देतात. त्यामुळे ट्रॅफिक जाम होऊन वेळेचा अपव्ययही होतो. या सगळ्याचा फटका येथील स्‍थानिक रहिवाशांना बसत आहे. रस्त्यावर अडथळा निर्माण झाल्यामुळे दुर्घटनांची शक्यताही वाढली आहे. नागरिकांनी वारंवार तक्रारी करूनही ना वाहतूक पोलिसांनी कारवाई केली, ना महापालिकेने कठोर पावले उचलली.
या भागातील रहिवाशांसह वाहनचालक आणि प्रवाशांचा त्रास दिवसेंदिवस वाढत असून, उपाययोजनांची जोरदार मागणी केली जात आहे. उड्डाणपुलाखाली बेकायदेशीरपणे पार्क करणाऱ्या वाहनचालकांवर त्वरित दंडात्मक कारवाई करावी. त्याचप्रमाणे रस्त्यावर पुन्हा अतिक्रमण करणाऱ्या फेरीवाल्यांविरोधात ठोस पावले उचलावीत अन्यथा आंदोलनाचा इशाराही काही संघटनांनी दिला आहे.