उद्यानांवर आता सीसीटीव्हीची नजर

उद्यानांवर आता सीसीटीव्हींची नजर
३०० कॅमेरे बसवण्याचा महापालिकेचा निर्णय
वाशी, ता. २ (बातमीदार) : नवी मुंबई शहराला ‘उद्यानांचे शहर’ म्हणून ओळखले जाते. शहरातील तब्बल २३७ उद्यानांमध्ये अनेक नागरिक सकाळ-संध्याकाळ विश्रांतीसाठी, व्यायामासाठी तसेच मुलांसह फिरायला येत असतात. मात्र काही ठिकाणी रात्रीच्या वेळी तळीराम, मद्यपी, जुगारी व अश्लील वर्तन करणारी प्रेमीयुगुल यांचा उपद्रव वाढत असल्यामुळे नागरिकांमध्ये अस्वस्थता पसरली आहे. या पार्श्वभूमीवर नवी मुंबई महापालिकेने शहरातील विविध उद्यानांमध्ये ३०० सीसीटीव्ही कॅमेरे बसवण्याचा प्रस्ताव तयार केला आहे.
महापालिकेच्या आधीच बसवलेल्या १,५०० हून अधिक सीसीटीव्हींप्रमाणेच हे नवीन कॅमेरेदेखील महापालिका मुख्यालयातील नियंत्रण कक्षाशी जोडले जाणार आहेत. शहरातील अनेक उद्यानांमध्ये रात्रीच्या वेळी सुरक्षा रक्षक नसल्यामुळे ही उद्याने मद्यपान, जुगार, छेडछाड, चोरी व इतर गैरकृत्यांची केंद्रे बनली आहेत. लहान मुलांचे खेळाचे साहित्यही मोडण्यात आले असून, शौचालये व ओपन जीमची उपकरणेदेखील नासधूस झाल्याचे अनेक ठिकाणी आढळून आले आहे.
ऐरोली सेक्टर ३ मधील राजीव गांधी उद्यान, रबाळे येथील स्मशानभूमीशेजारील उद्यान आणि घणसोलीमधील ट्री बेल्ट परिसर अशा ठिकाणी रात्री अंधाराच्या आड मद्यपी व प्रेमीयुगुलांचा वावर दिसतो. काही ठिकाणी रहिवाशांनी शॉर्टकटसाठी जाळी फोडल्याचेही समोर आले आहे. महापालिकेच्या या निर्णयामुळे महिलांची आणि लहान मुलांची सुरक्षितता वाढेल तसेच उद्यानांमध्ये होणाऱ्या गैरप्रकारांना चाप बसेल, अशी अपेक्षा आहे. यासोबतच उद्यानांच्या मालमत्तेचे संरक्षण व परिसरातील शांतता राखण्यासाठी हे पाऊल उपयुक्त ठरेल, असे बोलले जात आहे.
...............
नागरिकांचे म्हणणे
उद्यानांमध्ये सीसीटीव्ही बसल्याने रात्रीच्या वेळी होणाऱ्या गैरप्रकारांवर नियंत्रण ठेवता येईल. लहान मुलांचे खेळाचे साहित्य आणि महिला वापरत असलेल्या सोयीसुविधा सुरक्षित राहतील, असे मत अनुप आचरेकर यांनी व्यक्त केले.
...............
महापालिकेची भूमिका
नागरिकांच्या सुरक्षिततेसाठी ३०० सीसीटीव्ही बसवण्याचा प्रस्ताव तयार केला आहे. यामुळे उद्यानांमधील अनुचित प्रकार रोखले जातील, असे महापालिकेचे शहर अभियंता शिरीष आरदवाड यांनी सांगितले.