पालीवाला महाविद्यालयात मराठी वाङ्मय मंडळाचे उद्‌घाटन

पालीवाला महाविद्यालयात मराठी वाङ्मय मंडळाचे उद्‌घाटन
अलिबाग ः सुधागड एज्युकेशन सोसायटीच्या शेठ ज. नौ. पालीवाला महाविद्यालयात साहित्यरत्न अण्णा भाऊ साठे यांच्या १०५ व्या जयंतीनिमित्त मराठी भाषा विभागाच्यावतीने मराठी वाङ्मय मंडळाचे उद्‌घाटन उत्साहात पार पडले. यानिमित्ताने अण्णा भाऊ साठे आणि लोकमान्य टिळक यांच्या कार्यावर विद्यार्थ्यांना मार्गदर्शन करण्यात आले. कार्यक्रमाचे प्रमुख मार्गदर्शक तथा प्राचार्य डॉ. सुधाकर लहुपंचाग यांनी अण्णा भाऊंच्या साहित्यिक योगदानाबरोबरच संयुक्त महाराष्ट्र चळवळीत त्यांच्या भूमिकेचा विस्तृत आढावा घेतला. त्यांनी सांगितले की, अण्णाभाऊंच्या साहित्यातील पात्रे केवळ कलात्मक नव्हे, तर समाजातील तळागाळातील लोकांचे प्रतिनिधित्व करणारी आहेत. त्यांच्या लेखनावर आंबेडकरवादी व मार्क्सवादी विचारसरणीचा प्रभाव स्पष्टपणे जाणवतो. प्रा. यु. बी. इनामदार यांनी विद्यार्थ्यांच्या शैक्षणिक व व्यक्तिमत्त्व विकासात मराठी वाङ्मय मंडळाच्या भूमिकेवर प्रकाश टाकला. प्रा. डॉ. अंजली पुराणिक यांनी शाहिरीतील लोकशाहीरांच्या मूल्यांवर आणि समाजाच्या सहभागावर भाष्य केले. तर प्रा. डी. आर. शिवपुजे यांनी अण्णा भाऊंच्या अनौपचारिक शिक्षण आणि समाजातील वंचित घटकांप्रती असलेल्या कार्याबद्दल माहिती दिली. कार्यक्रमाचे प्रास्ताविक व आभार प्रा. ज्ञानेश्वर मुंढे यांनी केले. सूत्रसंचालन वेदश्री भावे यांनी केले, तर विद्यार्थ्यांतर्फे सागर दंत यांनी मनोगत व्यक्त केले. कार्यक्रमासाठी प्रा. शांतीकुमार खैरनार, प्रा. सर्जेराव पाटील, प्रा‌. विशाखा मानकामे, प्रा. सतू चव्हाण, प्रा. अनिल झेंडे, प्रा. सरिता देशमुख यांच्यासह अनेक प्राध्यापक उपस्थित होते.