उल्हासनगरात तरुणाची निर्घृण हत्या

उल्हासनगरात तरुणाची निर्घृण हत्या

उल्हासनगर, ता. २ (वार्ताहर) : कॅम्प १ भागात जुन्या भांडणाचा राग मनात धरून तब्बल १० ते १५ जणांच्या टोळक्याने एका तरुणावर धारदार शस्त्रांनी आणि चाकूने सपासप हल्ला करीत त्याची निर्घृण हत्या केली. या घटनेचे धक्कादायक सीसीटीव्ही फुटेज समोर आले असून, यामध्ये मृत तरुणाची गर्भवती पत्नी रुग्णालयात तडफडत न्यायाची मागणी करीत आहे.

साजिद शेख असे मृत तरुणाचे नाव असून, ही घटना शुक्रवारी (ता. १) सायंकाळी कॅम्प १ येथील साईबाबा मंदिर परिसरात घडली. साजिद आणि रोहित पासी या तरुणाची वाद मिटवण्यासाठी भेट झाली होती; मात्र या बैठकीत वाद आणखीनच चिघळला. यानंतर मध्यरात्री अडीचच्या सुमारास रोहित आणि त्याचा साथीदार प्रवीण उज्जीनवाल यांनी साजिदच्या मित्राला रस्त्यात अडवून साजिदला तिथे बोलावण्यास सांगितले. त्यानंतर मित्राच्या मदतीसाठी धावत गेलेल्या साजिदवर अचानक १० ते १५ जणांच्या टोळक्याने धारदार शस्त्रांनी हल्ला चढवला. यामध्ये गंभीर जखमी झालेल्या साजिदला रुग्णालयात दाखल करण्यात आले; मात्र तेथील डॉक्टरांनी त्याला मृत घोषित केले. ही घटना परिसरातील सीसीटीव्ही कॅमेऱ्यात कैद झाली आहे.
..
रुग्णालयात गर्भवती पत्नीचा टाहो
उल्हासनगर पोलिसांनी तत्काळ गुन्हा दाखल करीत रोहित पासी आणि प्रवीण उज्जीनवाल यांना अटक केली; मात्र उर्वरित आरोपी अजूनही फरार आहेत. त्यामुळे संतप्त झालेल्या साजिदच्या गर्भवती पत्नीने रुग्णालयात साजिदचा मृतदेह स्वीकारण्यास नकार दिला आहे. ‘सर्व आरोपींना अटक होईपर्यंत साजिदचा मृतदेह घेणार नाही,’ असे म्हणत तिने रुग्णालयातच टाहो फोडला. या घटनेने परिसरात खळबळ माजवली असून, नागरिकांमध्ये भीतीचे वातावरण आहे. या ठिकाणी पोलिस बंदोबस्त वाढवण्यात आला असून, इतर आरोपींचा शोध घेण्यासाठी विशेष पथके तयार करण्यात आली आहेत.