नियंत्रण सुटलेल्या ट्रकची वाहनांना धडक

नियंत्रण सुटलेल्या ट्रकची वाहनांना धडक
महिलेचा मृत्यू; सात जण जखमी

बदलापूर, ता. २ (बातमीदार) : वालिवली परिसरात बारवी धरणाकडे जाणाऱ्या रस्त्यावर नियंत्रण सुटलेल्या ट्रकने अनेक वाहनांना धडक दिल्याची घटना शनिवारी (ता. २) सकाळी घडली. यात प्रत्यक्षदर्शींनी दिलेल्या माहितीनुसार एका महिलेचा मृत्यू झाला असून सात जण जखमी झाले. या भरधाव ट्रकने त्याच्या मार्गात येणाऱ्या रिक्षा, दुचाकींना जोरदार धडक दिली.

वालिवली परिसरातील एका उतारावरून मुरबाडच्या दिशेने जाणाऱ्या मार्गावर हा अपघात शनिवारी सकाळी साडेसातच्या सुमारास घडली. या उतारावर भरधाव ट्रकचे नियंत्रण सुटले. या वेळी ट्रकचालकाने स्वतःच्या बचावासाठी ट्रकमधून उडी मारली आणि तो पसार झाला; मात्र या ट्रकने आपल्या मार्गात येणाऱ्या अनेक वाहनांसह पादचाऱ्यांनाही चिरडले. यामध्ये दुचाकीवरून आपल्या पतीसह जाणाऱ्या लालतीदेवी प्रजापती यांचा जागीच मृत्यू झाल्याची माहिती प्रत्यक्षदर्शींनी दिली. या भागातील अनेक सीसीटीव्ही कॅमेऱ्यांमध्ये या भरधाव ट्रकचा थरार कैद झाला आहे. या विचित्र अपघातात सात जण गंभीर जखमी झाल्याची माहिती आहे. या ट्रकच्या धडकेत श्रीराम मेहेर हे कारमध्ये अकडले. क्रेनच्या साहाय्याने ट्रकचा भाग वर उचलून ही चारचाकी बाजूला काढण्यात आली. त्यानंतर मेहेर यांना सुखरूप बाहेर काढण्यात यश आले. या अपघाताचा बदलापूर पश्चिम पोलिस अधिक तपास करीत आहेत.