तक्रारीची वेळ ठरवणाऱ्या कर्मचाऱ्यांना दणका

बदलापूर, ता. २ (बातमीदार) : बदलापूर पश्चिमेकडील महावितरण कार्यालयातील कर्मचाऱ्यांना ‘सकाळ’च्या बातमीचा चांगलाच दणका बसला आहे. स्वतःच्या सोयीप्रमाणे नियम बनवून ग्राहकांची दिशाभूल करणारे आणि तक्रारी घेण्याच्या ठराविक वेळेचे लावलेले सूचना फलक, या संदर्भात बातमी प्रसिद्ध होताच वरिष्ठांनी दिलेल्या आदेशावरून काढून टाकण्यात आले. त्यामुळे आता कार्यालयीन वेळेत ग्राहक कधीही आपली तक्रार महावितरणमध्ये मांडू शकतात. हा बदल घडल्यामुळे ग्राहकांनी समाधान व्यक्त केले आहे.
बदलापूर पश्चिमेकडील महावितरण कार्यालयातील कर्मचाऱ्यांच्या अनेक तक्रारी ग्राहक करत होते. यात मुख्य म्हणजे येथील कर्मचाऱ्यांनी कामाचा जास्त भार पडू नये म्हणून नियम बनवून ग्राहकांची तक्रार घेण्याची वेळ निश्चित केली होती. यात सायंकाळी चार वाजेपर्यंतच तक्रार घेतली जाईल, असे नमूद होते. कार्यालयीन वेळ ही सायंकाळी ६ वाजेपर्यंत असतानाही चार वाजेपर्यंतच तक्रार घेण्यात येईल असे या सूचना फलकात नमूद केले होते. वेळेच्या या बंधनामुळे अनेक ग्राहकांना तक्रार करता येत नव्हती. अनेकदा नोकरीवरून अर्ध्या दिवसाची रजा घेऊन कार्यालयात येईपर्यंत चार वाजण्याची वेळ टळून जायची. वेळेचे बंधन असल्यामुळे अनेकदा ग्राहकांना चारच्या आत महावितरण कार्यालयात जाण्याची धडपड करावी लागायची. ग्राहकांनी ही तक्रार समोर आणताच वरिष्ठांनी संपूर्ण कामकाजाच्या वेळेत ग्राहकांची तक्रार घेता येते. तक्रारीसाठी वेगळ्या ठराविक वेळेचे बंधन नसल्याचे स्पष्ट केले.
पश्चिमेकडील महावितरण कार्यालयात जर हा प्रकार होत असेल तर, हे चुकीचे असून यासंदर्भात कर्मचाऱ्यांना समज देऊन ही सूचना काढून टाकण्यात येईल, असे आश्वासन महावितरणचे अधिकारी काटकर यांनी दिले होते. त्याप्रमाणे या कर्मचाऱ्यांना सक्त ताकीद देऊन, लावण्यात आलेले हे सूचनाफलक काढून टाकण्यात आले आहे. यामुळे ग्राहकांना कार्यालयीन कामकाजाची वेळ सकाळी दहा वाजल्यापासून ते सायंकाळी सहा वाजेपर्यंत तक्रारी मांडता येत असल्यामुळे समाधान व्यक्त केले आहे.