विजेचा झटक्याने कामगाराचा मृत्यू

विजेचा झटक्याने कामगाराचा मृत्यू

भिवंडी, ता. २ (वार्ताहर) : विजेच्या झटक्याने एका कामगाराचा मृत्यू झाल्याची घटना घडली आहे. पोलिसांनी याप्रकरणी कंत्राटदाराला दोषी ठरवत त्याच्याविरोधात गुन्हा दाखल केला आहे. भिवंडी-कल्याण मार्गावरील गोवे नाका येथे नारायण युगेश्वर कामत्त ऊर्फ चौधरी (वय ३४) हा कामगार इमारतीवर काम करीत असताना त्याच्या हातातील कटावणी इमारतीच्या बाजूला असलेल्या वीजवाहक वायरला लागल्याने विजेच्या झटक्याने त्याचा मृत्यू झाला. कामाच्या ठिकाणी मजुरांना आवश्यक असलेली सुरक्षेची कोणतीही सुविधा न पुरवल्यामुळे ही घटना घडली. त्यामुळे या घटनेस बांधकाम कंत्राटदार मनोज दिलीप पाटील व मुरली यादव हे जबाबदार असल्याचा ठपका पोलिसांनी चौकशीत ठेवल्याने कोनगाव पोलिस ठाण्यात त्यांच्याविरोधात गुन्हा नोंदवण्यात आला आहे.