ज्येष्ठ नागरिकांची साडेपाच कोंटीची फसवणूक

ज्येष्ठ नागरिकांची साडेपाच कोंटीची फसवणूक

उल्हासनगर, ता. २ (वार्ताहर) : शेअर बाजारात भरघोस परताव्याचे प्रलोभन दाखवत एका ७३ वर्षीय ज्येष्ठ नागरिकाची तब्बल पाच कोटी ७७ लाख दोन हजार रुपयांची सायबर फसवणूक केल्याचा प्रकार उघडकीस आला आहे. ऑनलाइन माध्यमातून संपर्क साधत आरोपींनी त्यांना बनावट गुंतवणूक ॲप्समध्ये पैसे गुंतवायला लावले. याप्रकरणी उल्हासनगर पोलिसांनी तीन जणांविरोधात गुन्हा दाखल केला आहे.

विष्णू कोटवानी (वय ७३) यांच्याशी सायबर टोळीने समाजमाध्यमातून संपर्क साधत शेअर बाजार व ‘आयपीओ’मध्ये गुंतवणूक केल्यास मोठा परतावा मिळेल, असे प्रलोभन दाखवत त्यांचा विश्वास संपादन करण्यात आला. त्यानंतर त्यांना ‘बीएसएसएल’ आणि ‘आरपीएमटीए’ या नावांची दोन अप्लिकेशन मोबाईलमध्ये डाऊनलोड करण्यास सांगितले. फिर्यादींनी सांगितल्याप्रमाणे त्यांनी एकूण पाच कोटी ७७ लाख दोन हजार रुपयांची गुंतवणूक या माध्यमातून केली. मात्र काही काळानंतर त्यांना या अ‍ॅप्सवर कुठलाही परतावा मिळत नसल्याचे लक्षात आले आणि संपूर्ण गुंतवणूक बुडाल्याचे समजले. त्यांनी तत्काळ उल्हासनगर पोलिस ठाण्यात धाव घेतली. याप्रकरणी आशीष कुमार, ईशिता कपूर आणि अद्विक शर्मा या तीन जणांविरोधात फसवणुकीचा गुन्हा दाखल करण्यात आला असून, पोलिस या आरोपींचा शोध घेत आहेत.