उद्धव ठाकरे हे हिंदूंविरोधी : नरेश म्हस्के

उद्धव ठाकरे हे हिंदूंविरोधी : नरेश म्हस्के
सकाळ वृत्तसेवा

ठाणे, ता. २ : ‘पालघर येथे साधूंची हत्या झाली तेव्हा उद्धव ठाकरे मुख्यमंत्री होते. त्या वेळी उद्धव ठाकरे, राहुल गांधी अथवा पृथ्वीराज चव्हाण यांनी कोणतीही प्रतिक्रिया दिली नाही. त्यामुळे सनातन धर्माचा अपमान करणाऱ्या उद्धव ठाकरेंचा खरा चेहरा हा हिंदूविरोधी असल्याची टीका शिवसेना खासदार नरेश म्हस्के यांनी केली.

आनंद आश्रम येथे म्हस्के यांनी शनिवारी (ता. २) पत्रकार परिषदेत ही टीका केली. या वेळी माजी मुख्यमंत्री पृथ्वीराज चव्हाण यांनी सनातन धर्माला चुकून आतंकवाद म्हटले नाही, तर जाणूनबुजून म्हटल्याचा आरोपदेखील म्हस्के यांनी केला. तसेच हिंदूंवर आरोप करणे सोपे आहे. हिंमत असेल तर दहशतवादाविरोधात वक्तव्य करण्याचे धाडस ठेवा, असे आवाहन करीत उद्धव ठाकरे, पृथ्वीराज चव्हाण, राहुल गांधी यांनी जनतेची माफी मागावी, अशी मागणीही त्यांनी केली. लोकसभा निवडणुकीत घटना बदलणार असल्याचा प्रचार केला, तर विधानसभा निवडणुकीत पराजय झाल्यानंतर निवडणूक आयोगावर ठपका ठेवत असून. मतदार याद्यांवर आक्षेप घेत आहेत. याचा अर्थ चुकीचे नॅरेटिव्ह या देशात पसरवण्याकरिता व सहानुभूती मिळविण्यकरिता अशी वक्तव्ये करीत असल्याचा आरोप म्हस्के यांनी राहुल गांधी यांच्यावर केला. संसदेच्या बाहेर लोकं गोळा करायची आणि बालीश चाळे करायचे याला राजकारण म्हणत नाहीत, अशीदेखील टीका त्यांनी केली.