माजी आमदाराच्या पुत्राची सव्वासात लाखांची फसवणूक

माजी आमदाराच्या पुत्राची सव्वासात लाखांची फसवणूक
नवी मुंबई (वार्ताहर) : आयुर्वेदिक उपचार देण्याच्या प्रलोभनाने सायबर चोरट्यांनी योगगुरू रामदेव बाबा यांच्या पतंजली कंपनीच्या नावाचे बनावट संकेतस्थळ बनवून नवी मुंबईतील एका माजी आमदार पुत्राकडून तब्बल सव्वासात लाख रुपये उकळल्याचा प्रकार उघडकीस आला आहे. रबाळे पोलिसांनी या प्रकरणातील अज्ञात सायबर चोरट्यांविरोधात गुन्हा दाखल केला आहे.
तक्रारदार चेतन पाटील यांचे वडील रमेश पाटील हे भाजपचे माजी आमदार असून, ते घणसोलीतील तळवली भागात राहण्यास आहेत. रमेश पाटील यांची तब्येत बिघडल्याने त्यांच्यावर आयुर्वेदिक उपचार करण्यासाठी चेतन पाटील यांनी १४ जुलै रोजी इंटरनेटवर योगगुरू रामदेव बाबा यांच्या पतंजली आयुर्वेदिक उपचाराबाबत शोध घेतला. त्यावेळी सायबर चोरट्यांनी फसवणूक करण्यासाठी तयार केलेले बनावट पतंजली नावाचे संकेतस्थळ त्यांच्या निदर्शनास आले. या संकेतस्थळावर चेतन पाटील यांनी आपल्या वडिलांच्या आजारपणाबाबतची माहिती पाठवून दिल्यानंतर काही वेळातच एका व्यक्तीने पतंजलीचा प्रतिनिधी असल्याचे भासवून चेतन पाटील यांना संपर्क साधला. त्यानंतर त्याने पतंजलीच्या आयुर्वेदिक उपचाराच्या पॅकेजची माहिती देत त्यांचा विश्वास संपादन केला. तसेच त्यांना आयुर्वेदिक उपचारासाठी लागणाऱ्या पॅकेजचे पैसे पाठवण्यास भाग पाडले. त्यानुसार चेतन पाटील यांनी आरोपीच्या बँक खात्यावर सात लाख २५ हजारांची रक्कम पाठवून दिली. दरम्यान, पाटील कुटुंबीयांनी देहरादून येथील पतंजलीच्या सेंटरला उपचारासाठी भेट दिली. मात्र तेथे त्यांच्या नावाने कोणतीही नोंद नसल्याचे निदर्शनास आले. आपली फसवणूक झाल्याचे लक्षात आल्यानंतर चेतन पाटील यांनी याबाबत रबाळे पोलिस ठाण्यात तक्रार दाखल केली.