भटक्या श्वानांचा शालेय विद्यार्थिनीवर हल्ला

भटक्या श्वानांचा शालेय विद्यार्थिनीवर हल्ला
उल्हासनगर, ता. २ (वार्ताहर) : उल्हासनगर शहरातील मच्छी मार्केट परिसरातून सकाळी शाळेत जात असलेल्या चिमुकलीवर भटक्या श्वानांनी केलेला हल्ला थरकाप उडवणारा होता. परिसरातील नागरिकांनी प्रसंगावधान राखून तिला वाचवले.
उल्हासनगर शहरात भटक्या श्वानांचा प्रश्न दिवसेंदिवस गंभीर बनत आहे. महानगरपालिका निर्बीजीकरणाची मोहीम राबवत असल्याचा दावा सातत्याने करत असली, तरी प्रत्यक्षात या श्वानांची संख्या आणि त्यांचा उच्छाद नियंत्रणाबाहेर गेल्याचे दृश्य दिसून येत आहे. शहराच्या कॅम्प ५ परिसरातील मच्छी मार्केटमध्ये नुकतीच घडलेली एक थरारक घटना याचे उत्तम उदाहरण ठरते. ३० जुलैला सकाळी आठ वाजता शाळेत जाणाऱ्या एका लहान मुलीवर पाच ते सहा भटक्या श्वानांच्या टोळीने अचानक हल्ला चढवला. चिमुकली भीतीने किंचाळत सुटली आणि काही क्षणातच आजूबाजूच्या दुकानदार आणि पादचाऱ्यांनी धाव घेत तिला वाचवले. संपूर्ण प्रकार सीसीटीव्हीमध्ये कैद झाला आहे. मुलीला कोणतीही दुखापत झाली नसली, तरी तिच्या मनावर या घटनेचा परिणाम झाला आहे.