महिलेचा विनयभंग करणाऱ्या आरोपीस अटक

भिवंडी, ता. २ (बातमीदार) : भिवंडीतील साठेनगर भागात एका महिलेचा विनयभंग केल्याच्या आरोपाखाली नारपोली पोलिसांनी एकाला अटक केली आहे.
साठेनगर परिसरातील किराणा दुकानात एक २५ वर्षीय महिला ३० जुलैला रात्री ८ वाजता गेली होती. त्याच वेळी २१ वर्षीय जतिन खंडू साठे याने परिस्थितीचा फायदा घेत पीडितेशी बोलण्याचा प्रयत्न केला. नंतर अचानक तिला अयोग्यरित्या स्पर्श केला आणि तिचा हात धरला. त्याच्या कृतीला महिलेने विरोध केला, तेव्हा त्याने अश्लील कृत्य करून तिला जबरदस्तीने ढकलण्याचा प्रयत्न केला. या घटनेने महिला घाबरली आणि तत्काळ नारपोली पोलिस ठाण्यात तक्रार दाखल केली. पोलिसांनी गुन्हा दाखल करून आरोपीला अटक केली आहे. पुढील तपास पोलिस उपनिरीक्षक सोनाली पाटील करत आहेत.