भ्रष्टाचारप्रकरणी वाय. एस. रेड्डी यांच्यावर गुन्हा

भ्रष्टाचारप्रकरणी वाय. एस. रेड्डी यांच्यावर गुन्हा
विरार, ता. २ (बातमीदार) : वसई-विरार शहर महापालिकेच्या नगररचना विभागाचे निलंबित उपसंचालक वाय. एस. रेड्डी यांच्याविरुद्ध बेहिशेबी अपसंपत्तीप्रकरणी अखेर ठाणे लाचलुचपत प्रतिबंधक विभागाने शुक्रवारी (ता. १) गुन्हा दाखल केला.
रेड्डी यांच्यावर ठाणे लाचलुचपत प्रतिबंधक विभागाच्या तक्रारीवरून ही गुन्ह्याची कारवाई करण्यात आली असून, तपासाअंती रेड्डी यांच्याकडे कोट्यवधींची बेहिशेबी मालमत्ता असल्याचे स्पष्ट झाले होते. याअंतर्गत ईडीने (अंमलबजावणी संचालनालय) यापूर्वी १४ व १५ मे रोजी रेड्डी यांच्या नालासोपारा व हैदराबाद येथील निवासस्थानी छापेमारी केली होते. यामध्ये २३ कोटी २५ लाख ५० हजार ९०० रुपये किमतीचे सोन्याचे व हिरेजडित असे २६,३३८ ग्रॅम वजनाचे दागिने, आठ कोटी तीन लाख १२ हजार रुपये व १९ लाख ९५ हजार अशी रोख रक्कम अशी एकूण मिळून ३१ कोटी ४८ लाख ५७ हजार ९०० रुपयांची अपसंपदा हस्तगत केली होती. तपासानुसार, रेड्डी यांनी वसई-विरार महापालिकेत कार्यरत असताना आपल्या पदाचा गैरवापर करून मोठ्या प्रमाणात अपसंपत्ती मिळवली होती. त्यांच्याकडे आढळलेली संपत्ती ही त्यांच्या अधिकृत ज्ञात उत्पन्नाच्या स्रोतांपेक्षा अत्यंत जास्त असल्याने ही गुन्ह्यांची कारवाई करण्यात आली आहे.