गणेशोत्सव मंडळाच्या कार्यकर्त्यांना आपत्कालीन व्यवस्थापन शिबिराचे धडे

गणेशोत्सव मंडळाच्या कार्यकर्त्यांना आपत्कालीन व्यवस्थापन शिबिराचे धडे
जोगेश्वरी, ता. ३ (बातमीदार) ः गणेशोत्सवाच्या पाश्र्वभूमीवर आपत्कालीन परिस्थिती हाताळण्यास मंडळ कार्यकर्ते सक्षम व्हावेत, यासाठी अंधेरी पूर्वेतील गुंदवली येथील पालिकेच्या शाळेत विशेष प्रशिक्षण शिबिराचे आयोजन करण्यात आले होते. के पूर्व, के पश्चिम विभागातील अनेक गणेश मंडळांनी या उपक्रमात सहभाग घेतला. महापालिकेच्या वतीने आयुक्त भूषण गगराणी, गणेशोत्सच समन्वयक प्रशांत सकपाळ, के पूर्व विभागाचे वाॅर्ड अधिकारी नितीन शुक्ला, आपत्कालीन व्यवस्थापन अधिकारी लोखंडे यांच्या उपस्थितीत कार्यक्रम पार पडला. बृहन्मुंबई सार्वजनिक गणेशोत्सव समन्वय समितीचे अध्यक्ष ॲड. नरेश दहिबावकर यांच्या मार्गदर्शनाखाली हा उपक्रम राबवण्यात आला. अदाणी वीज वितरण कंपनीच्या अधिकाऱ्यांनी मार्गदर्शन केले. मुंबई अग्निशमन दलाचे ए. जे. जाधव आणि त्यांच्या चमूने, मंडपात आग लागल्यास काय उपाययोजना कराव्यात, कोणती उपकरणे आवश्यक असतात याचे प्रात्यक्षिकासह सखोल प्रशिक्षण दिले. प्राथमिक उपचाराचे साहित्य, आपत्कालीनप्रसंगी उपयोगी पडणाऱ्या यंत्रणा, गणेशभक्तांना अचानक इजा झाल्यास काय करावे, यासंबंधीही माहिती देण्यात आली. के पूर्व विभागाचे अधिकारी शुक्ला यांनी मंडळांना योग्य नियोजन आणि दक्षतेविषयी मार्गदर्शन केले. गैरहजर राहीलेल्‍या मंडळांना पुढच्‍या प्रशिक्षण सत्रात सहभागी होण्याचे आवाहनदेखील या वेळी करण्यात आले.