आकर्षक राख्यांनी बाजारपेठा सजल्‍या

आकर्षक राख्यांनी बाजारपेठा सजल्‍या
खरेदीसाठी महिलांची लगबग
शिवडी, ता. ३ (बातमीदार) ः बहीण-भावाच्या पवित्र नात्याचे प्रतीक असलेला सण रक्षाबंधन यंदा शनिवारी (ता. ९) साजरा होणार आहे. अनेकजण हा सण रक्षाबंधनाच्या दिवसापासून पुढील १५ दिवस साजरा करतात. त्यामुळे मुंबईतील सर्वच बाजारपेठा रंगबीरंगी, आकर्षक राख्यांनी सजल्‍या आहेत. आठवड्यावर रक्षाबंधन आल्‍याने राख्या खरेदी करण्यासाठी महिलांची लगबग सुरू आहे.
यंदा राख्यांच्या दरात काहीशी वाढ झाली आहे. बाजारात १० रुपयांपासून ५०० ते ६०० रुपये किमतीत आकर्षक राख्या उपलब्ध आहेत, तर सोन्या-चांदीच्या राख्या खरेदीकडेदेखील नागरिकांचा कल दिसत आहे. बाजारपेठेत विविध आकर्षक राख्या विक्रीस दाखल झाल्या आहेत. त्यात पारंपरिक देव राखी, गोंड्याची राखी, चंदन राखी, याशिवाय बच्चेकंपनींसाठी लायटिंग राखी, रेडियम राखी त्यासह छोटा भीम, डोरेमॉन, मोटू-पतलू, पपेट कडा राखी, श्री गणेशा राखी, श्रीकृष्ण राखी आदी आकर्षक राख्या दुकानांमध्ये दिसत आहेत, तर ऑनलाइन राखी खरेदीकडेदेखील नागरिकांचा कल आहे.
मुंबईतील क्रॉफर्ड मार्केट, मस्जिद बंदर, दादर, परळ, लालबाग या होलसेल बाजारपेठेत रक्षाबंधनाला मोठी आर्थिक उलाढाल होते. मुंबईतील सर्वच मुख्य बाजारपेठांमध्ये शनिवार, रविवार सुट्टीचा दिवस असल्‍याने महिलांची खरेदीसाठी मोठी गर्दी झाली होती. परदेशात तसेच शहराबाहेर कामानिमित्त असलेल्या भावाला वेळेत राखी पोहोचण्यासाठी महिनाभर आधीपासूनच बहिणींनी राखी खरेदी केली आहे. पोस्ट कार्यालय व खासगी कुरियरच्या माध्यमातून किंवा ऑनलाइन पद्धतीने चांगल्यात चांगली आणि आकर्षक राखी खरेदी करून वेळेत भावापर्यंत पोहोचवण्यासाठी त्‍या प्रयत्नशील आहेत.

महागाईचा फटका
यंदाच्या रक्षाबंधनाला व्यावसायिकांमध्येदेखील उत्साहाचे वातावरण आहे. किरकोळ विक्रेत्यांकडे राखी खरेदीसाठी गर्दी होत आहे. ग्राहक वाढले असल्याची माहिती या वेळी व्यावसायिकांकडून देण्यात आली. ग्राहक वाढले असले तरी महागाईचा फटका यंदाच्या रक्षाबंधनाला बसला असून, राख्यांच्या किमतींमध्ये २५ ते ३० टक्के एवढी वाढ झाली आहे.

ऑनलाइन राखीविक्री
ऑनलाइन राखीची किंमत १०० रुपयांपासून पुढे आहे. त्यात ग्राहकांना आकर्षित करण्यासाठी राखीसोबत चॉकलेट, चांदीचा शिक्का, हळद- कुंकू, कृत्रिम पानाचा विडा आदी भेटवस्तूंचा वापर करण्यात आला असल्याने राख्यांची ऑनलाइन विक्रीदेखील तेजीत आहे.