आशा सेविकांसाठी समान कायदा व वेतन लागू करावा

आशा सेविकांसाठी समान कायदा व वेतन लागू करावे
खासदार रवींद्र वायकर यांची मागणी
जोगेश्वरी, ता. ३ (बातमीदार) ः देशभरातील सुमारे १० लाख आशा सेविकांना समान कायदेशीर दर्जा आणि वेतन मिळावे, यासाठी शिवसेना शिंदे गटाचे खासदार रवींद्र वायकर यांनी लोकसभेत ठाम भूमिका मांडली. आशा सेविकांच्या समस्यांकडे केंद्र सरकारने गांभीर्याने लक्ष द्यावे, अशी मागणी त्यांनी केली. खासदार वायकर यांनी शून्य प्रहरावेळी आशा सेविकांच्या प्रलंबित प्रश्नाबाबत मुद्दा उपस्थित केला. आशा सेविकांना समान पगार, समान कायदा सिद्धांत लागू करून त्यांना दर महिन्याला पगार देण्यात यावा, त्यांना सामाजिक सुरक्षेच्या कक्षात आणून भविष्य निर्वाह निधी तसेच निवृत्ती वेतनाची सुविधा देण्यात यावी, सर्व आशा सेविकांना व त्यांच्या कुटुंबांना आरोग्य विमा व जीवन विमाचे कवच द्यावे, अशी मागणी वायकर यांनी केली आहे.