शाळेत घुमला ज्ञानेश्वरीतील मंगलप्रार्थनेचा नाद

शाळेत घुमला ज्ञानेश्वरीतील मंगल प्रार्थनेचा नाद
राहनाळ येथे पसायदान पाठांतर स्पर्धा
कल्याण, ता. ३ (वार्ताहर) : राहनाळ येथील जिल्हा परिषद केंद्र शाळेत इयत्ता पहिली ते चौथी व पाचवी ते सातवी अशा दोन गटांत संत ज्ञानेश्वर महाराज रचित पसायदान या मंगल प्रार्थनेच्या पठणावर आधारित स्पर्धा भक्तिभावात व उत्साहात पार पडली. या उपक्रमात विद्यार्थ्यांनी केवळ पाठांतरच नव्हे, तर त्यामागील अर्थपूर्णतेची प्रचिती दिली. संत ज्ञानेश्वर महाराजांनी आपल्या ‘ज्ञानेश्वरी’ ग्रंथाच्या अखेरीस लिहिलेले पसायदान ही केवळ धार्मिक प्रार्थना नसून एक सार्वत्रिक कल्याण, शांती व सद्भावनेची प्रार्थना आहे. विद्यार्थ्यांमध्ये संस्कार, अभिवाचन कौशल्य व सांस्कृतिक जाणीवा वाढाव्यात, या उद्देशाने शाळेचे मुख्याध्यापक अजय पाटील यांच्या संकल्पनेतून या स्पर्धेचे आयोजन केले होते.

स्पर्धेमध्ये विद्यार्थ्यांनी उत्तम तयारीसह सहभाग घेतला. लहान गटात आराध्या शिंदे हिने प्रथम क्रमांक, ईश्वरी नाईक हिने द्वितीय क्रमांक, तर प्रियांशी कनोजिया हिने तृतीय क्रमांक मिळवला. मोठ्या गटात राज राजभर याने प्रथम क्रमांक, श्रद्धा वरकड हिने द्वितीय क्रमांक, तर ऋषिकेश शिंदे याने तृतीय क्रमांक पटकावला. स्पर्धेच्या परीक्षक म्हणून संध्या जगताप व रसिका पाटील यांनी विद्यार्थ्यांच्या सादरीकरणाचे बारकाईने मूल्यांकन केले. त्यांनी विद्यार्थ्यांचे उच्चार, लय, स्पष्टता, भावपूर्ण अभिवाचन आणि आत्मीयता या निकषांवर गुणांकन केले.

प्रेरणादायी आध्यात्मिक शिक्षण
कार्यक्रमाचे सूत्रसंचालन अंकुश ठाकरे व रविना पाटील यांनी करत उपस्थितांची मने जिंकली. चित्रा पाटील यांनी आभार प्रदर्शन केले. शाळा व्यवस्थापन समितीच्या अध्यक्षा रजनी नाईक यांनी विजयी विद्यार्थ्यांचे अभिनंदन करत शाळेच्या उपक्रमशीलतेचे कौतुक केले. या उपक्रमामुळे विद्यार्थ्यांमध्ये आध्यात्मिक मूल्ये रुजवली गेली. केवळ पाठांतराच्या पलीकडे जाऊन ‘सर्वांच्या कल्याणासाठी प्रार्थना करणे’ ही संतपरंपरेची शिकवण विद्यार्थ्यांनी मनोमन आत्मसात केली. पालकांनाही शाळेतील या उपक्रमाचे कौतुक वाटले. पसायदान स्पर्धा ही विद्यार्थ्यांसाठी एक प्रेरणादायी आध्यात्मिक शिक्षण होती. ज्यातून ‘विश्वशांती, विवेकबुद्धी आणि सर्वांमध्ये समानतेची भावना’ हा विचार रुजवला गेला.