गव्हाण फाटा सेवा रस्ता चिखलात,

सेवारस्त्याला तलावाचे स्वरूप
जासई गव्हाण फाटा मार्गाकडे जेएनपीए, प्रशासनचे दुर्लक्ष
उरण, ता. ३ (वार्ताहर) ः जेएनपीए बंदराची वाहतूक कोंडी कमी करण्यासाठी महामार्ग प्रशासनाने ठेकेदाराच्या माध्यमातून गव्हाण फाटा ते नवघर फाटा असा रस्ता तयार केला. या मार्गाला सेवारस्ताही तयार करण्यात आला, मात्र या सेवारस्त्याला आता तलावाचे स्वरूप प्राप्त झाले आहे. त्यातही या मार्गाचा ताबा आता अवजड वाहनांनी घेतल्याने छोट्या वाहनचालकांना त्रास सहन करावा लागत आहे.
जेएनपीए बंदर आणि त्यावर आधारित आणखी बंदर निर्माण केले आहे. या पाच बंदरांची वाहतूक सुरळीत करण्यासाठी जेएनपीए पलस्पे मार्ग, बेलापूर, नवघर मार्ग राष्ट्रीय महामार्ग बनविले आहेत. तसेच वाहतूक कोंडी कमी करण्यासाठी उड्डाणपुलांची निर्मिती केली. त्या अनुषंगाने या परिसरातील गावातील नागरिकांसाठी सेवारस्ताही तयार करण्यात आला आहे, मात्र या सेवारस्त्यावर मोठमोठे खड्डे पडले असून, मार्गाला तलावाचे स्वरूप प्राप्त झाले आहे. अशातही दास्तानपासून ते गव्हाण फाट्यापर्यंत संपूर्ण सेवारस्त्यावर अवजड वाहने पार्क केलेली पाहायला मिळत आहेत. या वाहनांमुळे या सेवारस्त्यावर चिखलाचा राडा निर्माण झाला आहे. यामुळे छोट्या वाहनांना त्रास सहन करावा लागत असून, हे सेवारस्त्यावरील पार्क केलेली अवजड वाहने काढून हा सेवारस्ता स्वछ करावा, अशी मागणी जोर धरू लागली आहे. यासंदर्भात महामार्ग प्रशासनाचे अभियंता यशवंत घोटकर यांच्याशी सपंर्क केला असता प्रतिसाद देण्यात आला नाही.