रिक्षाचालकाला पावणे दोन लाखांचा गंडा

रिक्षाचालकाला पावणेदोन लाखांचा गंडा
सकाळ वृत्तसेवा
ठाणे, ता. ३ : ऑफिसमधील मॅडम यांना सोने तोलण्याचा वजनकाटा पाहिजे, असे म्हणत विश्वास संपादन करत उपवन, कोकणीपाडा येथील रिक्षाचालक लहू भोंडीवले यांना एका ग्राहकाने सुमारे पावणेदोन लाखांचा गंडा घातल्याची घटना समोर आली आहे. त्या ग्राहकाने रिक्षाचालकाची १७ ग्रॅम वजनाची सोनसाखळी घेऊन मोठ्या चलाखीने पोबारा केला. याप्रकरणी कळवा पोलिस ठाण्यात तक्रार दाखल करण्यात आली आहे.
रिक्षाचालक भोंडीवले हे बुधवारी (ता. ३०) सकाळी नेहमीप्रमाणे रिक्षा घेऊन निघाले. वागळे इस्टेट पासपोर्ट ऑफिसजवळ ते थांबले असताना एक ग्राहक त्यांच्याजवळ आला. पासपोर्ट ऑफिसच्या इमारतीमध्ये मी नोकरी करत असल्याचे सांगून त्याच्या मॅडम यांना सोने तोलण्याचा वजन काटा पाहिजे आहे. त्याच्यासाठी ठाणे स्थानकात जायचे असल्याचे सांगितले. ठाणे स्थानकात जाताना नितीन कंपनीजवळ आल्यावर त्या ग्राहकाने रिक्षा माजिवडा येथे घेण्यात सांगितले. त्यानुसार रिक्षा वळवून तेथून गांधीनगर पोखरण २ येथे रिक्षा घेण्यास सांगितले. तेथे गेल्यावर त्याने पाचशे रुपये दिले. म्हणाला, की या मार्केटमधील सोन्याचे दुकान बंद आहे. आपण दुसरीकडे जाऊ, असे सांगत त्याने कळवा-विटावा येथे जायचे, असे म्हटले. त्याचप्रमाणे रिक्षा कळवा नाका येथे घेऊन गेल्यावर त्यांनी पुन्हा पाचशे रुपये दिले. तसेच येथील मार्केटमध्ये त्याचे दुकान असून तेथून सोने तोलण्याचा काटा घेऊन येतो. वजन करण्यासाठी सोन्याची वस्तू पाहिजे आहे. रिक्षाचालक लहू यांच्याकडे त्यांच्या गळ्यातील सोनसाखळी वजन करण्यासाठी मागितली. विश्वास ठेवून रिक्षाचालकाने त्यांच्या गळ्यातील १७ ग्रॅम वजनाची सोनसाखळी दिल्यावर तो सोनसाखळी घेऊन तो पसार झाला. याप्रकरणी कळवा पोलिस ठाण्यात गुन्हा दाखल केला असून वरिष्ठ पोलिस निरीक्षक अशोक उतेकर यांच्या मार्गदर्शनाखाली तपास सुरू आहे.