भिवंडीत वीज पडून मजुराचा मृत्यू

भिवंडीत विजेच्या धक्क्याने मजुराचा मृत्यू
दोन कंत्राटदारांविरुद्ध गुन्हा दाखल
भिवंडी, ता. ३ (बातमीदार) : कल्याण-भिवंडी रस्त्यावरील गोवेगाव परिसरातील बांधकाम सुरू असलेल्या इमारतीत काम करणाऱ्या एका मजुराचा वीजवाहिनीच्या संपर्कात आल्याने मृत्यू झाला. या प्रकरणात पोलिसांनी दोन बांधकाम कंत्राटदारांविरुद्ध गुन्हा दाखल केला आहे, परंतु अद्याप कोणालाही अटक केलेली नाही.
पोलिसांनी दिलेल्या माहितीनुसार, कल्याण पश्चिम परिसरातील बारावे गावातील रहिवासी नारायण युगेश्वर कामत (३४) हे बुधवारी (ता. ३०) सकाळी ९.३० वाजता स्थानिक गोवेगाव येथील एका बांधकाम सुरू असलेल्या इमारतीजवळ काम करत होते. यादरम्यान जवळून जाणाऱ्या एमएसईबीच्या वीजवाहिनीच्या संपर्कात आल्यानंतर त्यांना जोरदार विजेचा धक्का बसला. यात त्यांचा जागीच मृत्यू झाला. तो मूळचा बिहारमधील मधेपूर येथील रहिवासी होता. मृताचा भाऊ अनिल चौधरी उर्फ कामत यांनी कंत्राटदार मनोज दिलीप पाटील आणि मुरली यादव यांच्यावर निष्काळजीचा आरोप केला आहे. बांधकामाच्या ठिकाणी आवश्यक सुरक्षा उपाययोजना आणि सुविधा पुरविल्या नव्हत्या, असे त्यांनी सांगितले. अनिल म्हणाले की, जर सुरक्षा उपकरणे आणि खबरदारी वेळीच घेतली असती, तर ही दुर्घटना टाळता आली असती. मृताच्या भावाच्या तक्रारीवरून कोनगाव पोलिसांनी कंत्राटदारांवर गुन्हा दाखल केला आहे. पोलिसांनी अद्याप आरोपींना अटक केलेली नाही. या प्रकरणाचा तपास पोलिस उपनिरीक्षक अनिल धुमसे करत आहेत.