ऐतिहासिक चर्चासत्र

पाली-संस्कृत-मराठी संवर्धनासाठी ऐतिहासिक चर्चासत्र
तिन्ही भाषांचा शालेय अभ्यासक्रमात समावेश करण्याचा ठराव संमत
नवी मुंबई, ता. ३ (वार्ताहर) : खारघर येथील सत्याग्रह महाविद्यालयात संस्कृत व मराठी अभिजात भाषांचा प्रचार-प्रसार आणि नागरिकांची जबाबदारी या विषयावर ऐतिहासिक चर्चासत्र पार पडले. यात पाली-संस्कृत व मराठी या तीन भाषांचा शालेय ते पदव्युत्तर शिक्षणापर्यंत केजी ते पीजी पातळीवर समावेश करण्यात यावा, असा ठराव एकमताने संमत करण्यात आला.
राहुल शिक्षण प्रसारक मंडळ संस्थेच्या सल्लागार रत्नमाला डोंगरगावकर यांच्या वाढदिवसाचे औचित्य साधून शनिवारी (ता. २) चर्चासत्राचे आयोजन करण्यात आले होते. अध्यक्षस्थानी ज्येष्ठ विचारवंत डॉ. जी. के. डोंगरगावकर होते. चर्चासत्राचे उद्‍घाटन डॉ. राकेश शेट्टी यांच्या हस्ते झाले. या वेळी प्रमुख वक्ते म्हणून डॉ. निधी अग्रवाल, डॉ. प्रीती शर्मा, प्रा. रक्षा लादे, प्रा. एलोरा मित्रा, प्रा. ललिता यशवंते, प्रा. सोनाली सूर्यवंशी तसेच विशेष अतिथी म्हणून बुद्धांची शिकवण या इंग्रजी ग्रंथाचे अनुवादक ज. मा. साबळे उपस्थित होते.
या चर्चासत्राचे उद्दिष्ट समजावून सांगताना विभागप्रमुख प्रा. सतीश पवार यांनी संस्कृत भाषेला २००५ मध्ये अभिजात दर्जा मिळाल्याचे सांगितले. पाली आणि मराठी भाषेसाठी देशभरातून चळवळी उभ्या राहिल्यामुळे केंद्र सरकारने अखेर पाली भाषेलाही अभिजात दर्जा दिला असून, ही ऐतिहासिक उपलब्धी असल्याचे त्यांनी सांगितले. या वेळी प्राचार्य नेहा राणे, ज. मा. साबळे, डॉ. निधी अग्रवाल, डॉ. प्रीती शर्मा आणि इतर वक्त्यांनीसुद्धा अभिजात भाषांना शासनाच्या धोरणांमध्ये प्राधान्य मिळावे यासाठी अनुदान आधारित धोरण राबवण्याची गरज अधोरेखित केली.
या वेळी डॉ. डोंगरगावकर यांनी सत्याग्रह महाविद्यालयाच्या वतीने भारतीय संविधानाचा पाली भाषेत अनुवाद करण्याचा प्रकल्प राबवण्यात येणार असून, महाड चवदार तळे सत्याग्रहाच्या शताब्दीनिमित्त हा ग्रंथ प्रकाशित केला जाणार असल्याचे त्यांनी या वेळी स्पष्ट केले. या चर्चासत्रामध्ये पाली-संस्कृत-मराठी या तीन भाषांचा अभ्यासक्रमात समावेश व्हावा, यासाठी भाग एक ः मराठी - ४० गुण, भाग दोन : संस्कृत -३० गुण, भाग तीन : पाली - ३० गुण असे नवे सूत्र मांडण्यात आले. हे प्रमाण शालेय ते पदव्युत्तर शिक्षणापर्यंत राबवावे, असा ठराव एकमताने संमत करण्यात आला.