दिव्यात डेंग्यूचा तर, नौपाडा कोपरीत मलेरियाचा कहर

दिव्यात डेंगी, तर नौपाडा-कोपरीत मलेरियाचा कहर
ठाणे पालिका क्षेत्रात साथीच्या आजारांनी काढले डोके वर
सकाळ वृत्तसेवा
ठाणे, ता. २ : पावसाळा सुरू होताच साथीच्या आजारांनी आपले डोके वर काढण्यास सुरुवात केली आहे. अशातच ठाणे पालिका क्षेत्रात साथीच्या आजारांच्या रुग्णांच्या संख्येत वाढ होत आहे. ठाण्यात जुलै महिन्यात मलेरियाचे १२३, डेंगीचे १२७, टायफॉइडचे २७ आणि चिकुनगुनियाचे २९ रुग्ण आढळून आले आहेत, तर दुसरीकडे यामध्ये दिवा शहरात डेंगीचे सर्वाधिक ४५ रुग्ण, तर नौपाडा-कोपरीत मलेरियाचे सर्वाधिक २९ रुग्ण आढळून आले आहेत.
ठाणे पालिका क्षेत्रात गेल्या काही दिवसांपासून कोसळणारा पाऊस आणि वातावरणात होणारे बदल यामुळे साथीच्या आजारांमध्ये वाढ होत आहे. पालिका क्षेत्रात मे महिन्यात डेंगीचे १५ रुग्ण, तर मलेरियाचे १६ रुग्ण आढळून आले होते, परंतु जून महिन्यात या रुग्णसंख्येत वाढ झाल्याचे दिसत आहे. १ जून ते २६ जून या कालावधीत पालिका क्षेत्रात डेंगीचे ६५, तर मलेरियाचे ५५ रुग्ण आढळून आले आहेत, अशी माहिती आरोग्य विभागाकडून देण्यात आली. त्यानंतर जुलै महिन्यात पुन्हा हा आकडा वाढताना दिसून आला आहे. एकट्या जुलै महिन्यात ठाण्यात मलेरियाचे १२३, डेंगीचे १२७, टायफॉइडचे २७ आणि चिकुनगुनियाचे २९ रुग्ण आढळून आले आहेत. त्यातही टायफॉइडचे सर्वाधिक ११ रुग्ण हे दिवा प्रभाग समितीत आढळून आले आहेत, तर चिकनगुनियाचे १४ रुग्ण हे माजिवडा-मानपाडा प्रभाग समितीत आढळून आले आहेत. मलेरियाचे सर्वाधिक २९ रुग्ण नौपाडा-कोपरी प्रभाग समिती आणि डेंगीचे सर्वाधिक म्हणजेच ४५ रुग्ण हे दिवा प्रभाग समितीत आढळून आले आहेत.

आरोग्य यंत्रणांकडून काळजी
ठाणे पालिका क्षेत्रात साथीच्या आजारांनी डोके वर काढू नये म्हणून आरोग्य यंत्रणांकडून काळजी घेण्यात येते. त्याचाच एक भाग म्हणून निर्माणाधीन इमारती, पंक्चर टायर दुरुस्ती दुकाने, गॅरेज, अशा सर्वांना पालिकेकडून नोटिसा बजावण्यात येतात आणि त्यात पावसाचे पाणी साठणार नाही, याची काळजी घेण्याचे आवाहन केले.

प्रभाग समिती - मलेरिया - डेंगी
दिवा - १८ - ४५
कळवा - ०९ - २०
लोकमान्य सावरकर नगर - २२ - २०
माजिवडा-मानपाडा - १७ - २३
मुंब्रा - ०७ - १४
नौपाडा-कोपरी - २९ - ०१
उथळसर - ०९ - ०२
वर्तकनगर - ०६ - ०७
वागळे इस्टेट - ०६ - ०१

--