प्राणिमित्र संघटनेची विद्यार्थ्यांमध्ये जनजागृती

प्राणिमित्र संघटनेची विद्यार्थ्यांमध्ये जनजागृती
कल्याण, ता. ३ (बातमीदार) : पावसाळ्याच्या दिवसांत मानवी वस्तीत साप शिरण्याच्या घटना वारंवार समोर येतात. काहीवेळी भीतीपोटी सापाला मारून टाकले जाते; मात्र असे न करता सर्पमित्रांशी संपर्क करण्याचे आवाहन वॉर प्राणिमित्र संघटनेने शालेय विद्यार्थ्यांना केले आहे. यासंदर्भात कल्याण पश्चिमेतील नूतन विद्यालयातील विद्यार्थ्यांना सर्व प्रकारच्या सापांबाबत माहिती देत जनजागृती केली.

पावसाळ्यात जोरदार पावसामुळे अथवा पुरामुळे सापांची बिळे पाण्याने भरतात. ओल्या बिळांत टिकून राहणे कठीण असल्याने साप कोरड्या व सुरक्षित जागेच्या शोधात स्वतःचा जीव वाचवण्यासाठी आणि नवीन निवारा शोधण्यासाठी मानवी वस्तीच्या दिशेने येतात. उंदीर, बेडूक, सरडे आणि इतर छोटे प्राणी हेदेखील पावसाळ्यात मानवी वस्तीमध्ये येतात. त्यामुळे अनेकदा अन्नाच्या शोधात सापही मानवी वस्तीत शिरकाव करतात. त्याचबरोबर काही जातींच्या सापांचा हा प्रजनन काळ असल्याने त्यांच्या हालचाली वाढतात व नकळत ते मानवी वस्तीकडे वळतात. सध्याच्या काळात बेसुमार वृक्षतोडीमुळे जंगलाच्या कमी झालेल्या क्षेत्रामुळे आणि वाढत्या माणसांच्या हस्तक्षेपामुळे सापांचे नैसर्गिक अधिवास कमी होत आहे, परिणामी ते मानवी वस्तीत आढळत आहेत.

पावसाळ्याच्या कालावधीत सापांचा मानवी वस्तीत वावर आणि साप चावण्याच्या घटना मोठ्या प्रमाणात वाढतात. त्यामुळे अशा परिस्थितीत काय करायला हवे, याबाबतही सर्व माहिती विद्यार्थ्यांना देण्यात आली. अशा प्रकारची जनजागृती ग्रामीण तसेच निमशहरी भागात होणे गरजेचे असल्याचे या वेळी शाळेच्या शिक्षकांकडून सांगण्यात आले. तसेच कुठेही साप आढळून आल्यास चुकीच्या पद्धतीने पकडण्याचा प्रयत्न न करता त्याला सर्पमित्रांशी संपर्क साधण्याचे आवाहन वॉर प्राणिमित्र संघटनेने केले आहे. फोन येताच काही वेळात घटनास्थळी पोहोचून सापाला रेस्क्यू करून नैसर्गिक अधिवासात सोडले जाते.