गव्हर्नर्मेंट कॉलनीच्या राजाचा पाटपूजन सोहळा उत्‍साहात

गव्हर्नमेंट कॉलनीच्या राजाचा पाटपूजन सोहळा उत्‍साहात
तुर्भे, ता. ५ (बातमीदार) : गणेशोत्सव अवघ्या काही दिवसांवर येऊन ठेपला असून, सर्वत्र गणेशभक्तांना उत्सवाची चाहूल लागली आहे. मुंबईसह नवी मुंबईत ठिकठिकाणी बाप्पाच्या आगमनाची जय्यत तयारी सुरू झाली आहे. सीबीडी बेलापूर येथील सुखकर्ता आणि दुःखहर्ता अशी ख्याती असलेल्या शासकीय वसाहतीमधील गव्हर्नमेंट कॉलनीच्या राजाचा पाटपूजन सोहळा नुकताच मोठ्या उत्साहात पार पडला. या मंडळाचे यंदा ४२वे वर्ष आहे. या भक्तिमय सोहळ्यासाठी बेलापूर विधानसभा आमदार मंदा म्हात्रे उपस्थित होत्या.
यंदा २७ ऑगस्ट रोजी गणेश चतुर्थी साजरी होणार असून, नवी मुंबईत अनेक ठिकाणी गणरायाचे पाटपूजन सोहळे उत्साहाने पार पडले. विशेष म्हणजे यंदा क्लासिक मित्रमंडळाच्या संकल्पनेतून ‘रुजवू मराठी, फुलवू मराठी’ या शीर्षकाखाली गव्हर्नमेंट कॉलनीच्या राजाचा पाटपूजन सोहळा पारंपरिक पद्धतीने पूजाअर्चा करून पार पडला. या वेळी बाप्पाचा जयघोष आणि ढोल-ताशा पथकाच्या सादरीकरणाने अवघा परिसर दुमदुमून गेला होता. त्यामुळे सोहळ्याला खऱ्या अर्थी भक्तीरसाचा रंग चढला होता. या वेळी पंचक्रोशीतील नागरिकांनी मोठ्या संख्येने हजेरी लावली होती.
दरम्यान, मराठी ही भारतातील एक जुनी भाषा असून संत साहित्यामुळे ती टिकली आहे. त्‍यामुळे मराठी भाषा भविष्यातही टिकवायला हवी. जर भाषा असेल तर तुमची संस्कृती टिकेल. तुमची संस्कृती टिकली तर तुम्हाला सामाजिक, राजकीय ओळख प्राप्त होईल, हा संदेश या सोहळ्याच्या माध्यमातून देण्याचा आमचा प्रयत्न असल्याचे मत क्लासिक मित्रमंडळाचे अध्यक्ष गणेश भवार यांनी व्यक्त सांगितले. या सोहळ्याप्रसंगी बेलापूर विधानसभा आमदार मंदा म्हात्रे, स्थायी समिती सभापती डॉ. जयाजी नाथ, पोलिस निरीक्षक नाथ लोखंडे, क्लासिक मित्रमंडळाचे अध्यक्ष गणेश भवार, वैभव रापशे, राजेश आडागळे, प्रमोद हाटे, जयदेव ठाकूर, किशोर पाटील, पंकज कदम, सुशील देसाई, संदीप कोळी, बाबू चव्हाण यांच्यासह मंडळाचे कार्यकर्ते आणि परिसरातील नागरिक मोठ्या संख्येने उपस्थित होते.