स्थानक परिसरातील पुलावर फेरीवाल्यांचे अतिक्रमण

नेरूळ स्थानक परिसरातील पादचारी पुलावर फेरीवाल्यांचे अतिक्रमण; नागरिक त्रस्त
नेरूळ, ता. ३ (बातमीदार) ः नेरूळ रेल्वेस्थानक परिसरातील पादचारी पुलावर मोठ्या प्रमाणात फेरीवाल्यांनी अतिक्रमण केल्याने सर्वसामान्य प्रवाशांना प्रचंड अडथळ्यांचा सामना करावा लागत आहे. सकाळी आणि सायंकाळी प्रवासाचा प्रमुख कालावधी असताना पुलावरून मुक्तपणे चालणे कठीण झाले असून, नागरिकांना गर्दीतून वाट काढावी लागत आहे.
पूर्व-पश्चिम नेरूळ परिसर जोडणारा हा पादचारी पूल स्थानिकांसाठी महत्त्वाचा दुवा असून, या पुलावर कपडे, भाजीपाला, फळे, खेळणी, मोबाईल कव्हर्स अशा विविध वस्तू विक्रीसाठी मांडण्यात आल्या आहेत. फेरीवाल्यांनी पुलाच्या दोन्ही बाजूंना दुकाने उभारल्यामुळे पादचाऱ्यांना चालण्यासाठी मोकळी जागा उरलेली नाही. विशेषतः महिलांना आणि वृद्धांना या कोंडीतून मार्ग काढताना मनस्ताप सहन करावा लागत आहे. अतिक्रमणासोबतच या ठिकाणी अस्वच्छता वाढली असून, उघड्यावर अन्नपदार्थांची विक्री, घाण साचलेली अवस्था आणि कुजकट वास यामुळे आरोग्याच्या समस्या निर्माण होण्याची शक्यता आहे. महिलांवर टिप्पणी, धक्काबुक्की यांसारख्या प्रकारांमुळे सुरक्षेचा प्रश्नही गंभीर झाला आहे.
...............
या परिसराचे व्यवस्थापन नवी मुंबई महापालिका आणि रेल्वे प्रशासन यांची संयुक्त जबाबदारी असताना दोघांपैकी कुणीही कारवाई न केल्यामुळे नागरिकांत तीव्र संताप पसरला आहे. फेरीवाल्यांचे अतिक्रमण दूर करून पादचाऱ्यांसाठी मोकळा मार्ग उपलब्ध करून देणे अत्यावश्यक बनले आहे. स्थानिक नागरिकांनी फेरीवाल्यांना तत्काळ हटविण्याची, पुलावर सुरक्षा रक्षकांची नेमणूक करण्याची, तसेच अतिक्रमणाविरोधात नियमित मोहीम राबवण्याची जोरदार मागणी केली आहे. प्रशासनाने याकडे गांभीर्याने लक्ष न दिल्यास जनआंदोलन छेडण्याचा इशाराही काही संघटनांनी दिला आहे.