पनवेलमध्ये मनसे कार्यकर्त्यांची बारवर दगडफेक

पनवेलमध्ये मनसे कार्यकर्त्यांची बारवर दगडफेक

पनवेल, ता. ३ (वार्ताहर) : शेकापच्या वर्धापनदिन सोहळ्यात शनिवारी (ता. २) महाराष्ट्र नवनिर्माण सेनेचे अध्यक्ष राज ठाकरे यांनी छत्रपती शिवाजी महाराजांची राजधानी असलेल्या रायगड जिल्ह्यात अनधिकृत डान्स बारच्या वाढत्या संख्येवर टीका केली होती. त्यानंतर मनसेच्या कार्यकर्त्यांनी शनिवारी रात्री जुन्या मुंबई-पुणे महामार्गावरील बारवर दगडफेक करून तोडफोड केली. याप्रकरणी पनवेल तालुका पोलिसांनी तोडफोड करणाऱ्या १५ ते २० मनसे कार्यकर्त्यांवर गुन्हा दाखल केला आहे.
‘रायगड हा छत्रपती शिवाजी महाराजांची राजधानी असलेला जिल्हा असून, महाराजांचा राज्यकारभार ज्या किल्ल्यांवरून चालला, त्या किल्ल्यावरून या जिल्ह्याला रायगड असे नाव पडले, असे असताना रायगडची ओळख आता डान्स बारचा जिल्हा अशी होऊ लागली आहे, तसेच छत्रपती शिवाजी महाराजांच्या राजधानीत अनधिकृत डान्स बार कसे सुरू राहतात,’ असा थेट सवालही ठाकरे यांनी उपस्थित केला. ठाकरेंच्या या विधानानंतर काही तासांतच मनसेच्या कार्यकर्त्यानी शनिवारी रात्री साडेअकरा वाजण्याच्या सुमारास जुन्या मुंबई-पुणे महामार्गावर कोन गाव येथे असलेल्या नाइट रायडर्स लाइव्ह ऑर्केस्ट्रा या लेडीज बारवर दगडफेक केली. तसेच बारचा दरवाजा व काचा फोडल्या. या घटनेनंतर बारमालक रामण्णा शेट्टी यांनी पनवेल तालुका पोलिस ठाण्यात तक्रार दाखल केली; त्यानुसार पोलिसांनी मनसे महानगर प्रवक्ता योगेश चिल्ले, राहुल चव्हाण, संजय मुरकुटे, किरण गुरव, अक्षय हाके व इतरांविरोधात गुन्हा दाखल केला आहे.