कोळी बांधवांच्या आनंदाला उधाण

वसई, ता. ३ (बातमीदार) : पालघर जिल्ह्यात मासेमारी करणाऱ्या बोटी टप्प्याटप्प्याने समुद्रात मासेमारीसाठी रवाना होऊ लागल्या आहेत. गेल्या दोन दिवसांत एकूण ३० टक्के बोटींचा प्रवास सुरू झाल्याची माहिती मत्स्यव्यवसाय विभागाकडून देण्यात आली आहे. उर्वरित बोटी काही दिवसांत समुद्रात जाणार आहेत.

पावसाळ्यात मासे प्रजनन कालावधी आणि मच्छीमारांच्या सुरक्षेसाठी मासेमारी बंद ठेवण्यात आली होती, मात्र ऑगस्टपासून पुन्हा सुरू झाली आहे. दोन महिने मासेमारीबंदी कालावधी होता. पालघर जिल्ह्यातील मच्छीमार बांधवांनी दर्याच्या राजाला प्रार्थना करत प्रवास सुरू केला आहे. यानिमित्त अर्नाळा येथील कोळीवाड्यातील कोळी भगिनींचा आनंद ओसंडून वाहत होता. बंदी कालावधीमुळे आलेले आर्थिक संकट दूर होईल, अशी आशा पल्लवित झाली आहे. त्यामुळे महिलांमध्ये समाधान व्यक्त करण्यात येत होते.

वसई, सातपाटी, डहाणू, पाचूबंदर, नायगाव समुद्रकिनारी दोन हजारांहून अधिक बोटी आहेत. दोन महिन्यांच्या कालावधीत मासेमारी बंद होती. त्यामुळे उदरनिर्वाहाचे साधन उपलब्ध नव्हते, तर खवय्यांचीदेखील पंचाईत झाली होती, मात्र पुन्हा सागरी प्रवास सुरू झाला आहे. आतापर्यंत जिल्ह्यातील शेकडो बोटी या मासेमारीसाठी गेल्या आहेत.

मासळी मिळण्यासाठी प्रार्थना
दोन महिने मासेमारीबंदी कालावधी होता, मात्र ऑगस्टपासून मासेमारीला सुरुवात झाल्याने व्यवसाय, रोजगाराचे साधन उपलब्ध होणार आहे. त्यामुळे अर्नाळा येथे कोळी भगिनींनी आनंद साजरा केला आणि पारंपरिक वेशभूषेत समुद्रकिनारी जाऊन दर्याला नारळ अर्पण करून मासे भरपूर मिळू दे, अशी प्रार्थना करण्यात आली, असे कोळीबांधव निनाद पाटील यांनी सांगितले.

पालघर जिल्ह्यात बोटींधारकांना परवाना वाटप करण्यात येत आहे. मागील दोन दिवसांत ३० टक्के बोटी या समुद्रात मासेमारीसाठी गेल्या आहेत, उर्वरित लवकरच जाणार आहेत. सध्या तरी वादळाचा इशारा नाही. त्यामुळे मासेमारीकरिता बोटी जात आहेत.
- दिनेश पाटील, सहाय्यक आयुक्त, मत्स्यव्यवसाय विभाग