महामार्ग होणार कोंडीमुक्त

पालघर, ता. ३ (बातमीदार) : मुंबई-अहमदाबाद महामार्गावर जव्हार फाटा, हालोली आणि सातिवली येथे अंडरपासचे काम अपूर्ण असल्याने मोठ्या प्रमाणात वाहतूक कोंडी निर्माण होते आहे. हे काम तत्काळ पूर्ण करण्याचे स्पष्ट निर्देश जिल्हाधिकारी डॉ. इंदुराणी जाखड यांनी राष्ट्रीय महामार्ग प्राधिकरणाच्या प्रकल्प संचालकांना दिले. तसेच अनधिकृत रस्ते आणि दुभाजक बंद करण्याचे आदेश त्यांनी दिले.

पालघर जिल्हाधिकारी तथा जिल्हा रस्ता सुरक्षा समितीच्या अध्यक्षा डॉ. जाखड यांच्या अध्यक्षतेखाली मुंबई-अहमदाबाद महामार्गावरील वाहतूक कोंडी, अपघात प्रवण ठिकाणे, रस्त्यांची दुरुस्ती आणि पादचारी पुलाच्या अनुषंगाने बैठक घेण्यात आली. या बैठकीला विविध विभागांचे वरिष्ठ अधिकारी उपस्थित होते. तलासरी ते वरखंडेदरम्यान अनेक ठिकाणी अनधिकृत जोडरस्ते आणि दुभाजक खुले असल्याने अपघातांचे प्रमाण वाढले आहे. स्थानिकांच्या भावना लक्षात घेता, हे रस्ते बंद करताना पोलिस बंदोबस्त देण्याचे निर्देश जाखड यांनी संबंधित विभागाला दिले. तसेच महामार्गावर सध्या एकूण पाच रुग्णवाहिका कार्यरत असून, सर्व रुग्णवाहिका अद्ययावत व सुस्थितीत ठेवण्याचे आदेश देण्यात आले.

अपघात प्रवण भागांमध्ये सुधारणा
मेंढवन येथे वळणाच्या ठिकाणी वारंवार अपघात घडत आहेत. या ठिकाणी साइन बोर्ड व रात्रीसाठी ब्लिंकर बसविण्यात आले आहेत. तसेच शाश्वत उपाययोजनांसाठी नवीन डीपीआर तयार करण्याचे काम प्रगतिपथावर आहे.

वसई फाटा-टोलनाका मार्गिकेचे नूतनीकरण
या मार्गावरील काँक्रीटला तडे गेल्याने खड्डे पडून अपघात होत आहेत. एकूण २२ हजार पॅनेलपैकी १५ हजार पॅनेलची दुरुस्ती पूर्ण झाली असून, उर्वरित काम लवकर पूर्ण करण्याचे निर्देश देण्यात आले आहेत. स्थानिक मागणीच्या पार्श्वभूमीवर पारसीधावा, दापचरी, फणसपाडा, बावखळ, सासुपाडा, वंगणपाडा, शिवेचापाडा आदी १० ठिकाणी नवीन पादचारी पूल उभारणीचे काम सुरू आहे.