झोपडपट्टीतील रहिवाशांची कुंडली तयार होणार

झोपडपट्टीतील रहिवाशांची कुंडली तयार होणार
रहिवाशांचे बायोमेट्रिक, झोपडीचे जीआयएस मॅपिंग करण्याचा एसआरएचा निर्णय; डिसेंबरअखेर काम पूर्ण करण्याचे उद्दिष्ट
सकाळ वृत्तसेवा
मुंबई, ता. ३ ः मुंबईतील झोपडीधारकांची आता कुंडली तयार होणार आहे. त्यासाठी झोपडपट्टी पुनर्वसन प्राधिकरणाकडून (एसआरए) झोपडीधारकांचे बायोमेट्रिक सर्वेक्षण आणि भौगोलिक माहिती प्रणालीद्वारे (जीआयएस) मॅपिंग केले जाणार आहे. त्यामुळे मुंबईत कुठे किती झोपड्या असून त्याची मालकी कोणाची आहे, याबाबतची माहिती तयार होणार आहे. हे सर्वेक्षण डिसेंबरअखेर पूर्ण करण्याचे उद्दिष्ट एसआरएने ठेवले आहे.
मुंबई शहरासह उपनगरात मोठ्या प्रमाणात झोपड्या आहेत. त्याचा पुनर्विकास करतानाच मुंबईला झोपडपट्टीमुक्त करण्याचा निर्णय राज्य सरकारने घेतलेला आहे. लाखो झोपड्या असूनही त्याची डेटा बँक नाही. त्यामुळे कोणत्या परिसरात किती झोपड्या आहेत, त्यामध्ये किती कुटुंबे वास्तव्यास आहेत. त्याची माहिती उपलब्ध झाल्यास मुंबईला झोपडपट्टीमुक्त करण्यासाठीचा सखोल आराखडा तयार करणे शक्य होणार आहे. त्यासाठी एसआरएने २०२१ मध्ये ड्रोन सर्वेक्षणाद्वारे मुंबईतील २,५९७ झोपडपट्टी विभागाची माहिती गोळा केली होती. त्यामुळे आता उर्वरित झोपडपट्ट्यांचे सर्वेक्षण आणि झोपडीधारकांचे बायोमेट्रिक सर्वेक्षण केले जाणार आहे. त्यासाठी स्वतंत्र एजन्सी नियुक्त करण्यात येणार आहेत. दरम्यान, म्हाडा आणि मुंबई महापालिकेच्या भूखंडावरील झोपड्यांचे सर्वेक्षण दोन्ही संस्था स्वतंत्रपणे करणार आहेत.

बेकायदा झोपड्यांना आळा बसणार
मुंबईला झोपडपट्टीमुक्त करण्यासाठी सरकारकडून सातत्याने प्रयत्न केले जात असले तरी नव्याने अनेक ठिकाणी झोपड्या उभ्या राहत आहेत; मात्र आता एसआरए सखोल सर्वेक्षण करणार असल्याने नव्याने उभा राहिणाऱ्या झोपड्यांची सहजपणे ओळख पटवणे शक्य होणार आहे. परिणामी, बेकायदा झोपड्यांना आळा घालणे शक्य होणार आहे.