जलवाहिनी फुटल्याने लाखो लिटर पाणी वाया

जलवाहिनी फुटल्याने लाखो लिटर पाणी वाया
उल्हासनगर, ता. ४ (वार्ताहर) : शहराच्या कॅम्प तीनमधील मध्यवर्ती फ्लोवर लाइन चौकात शनिवारी (ता. २) रात्री अचानक जलवाहिनी फुटली. यामुळे प्रचंड प्रमाणात पाणी रस्त्यावर साचले. या घटनेमुळे लाखो लिटर पिण्याचे पाणी अक्षरशः रस्त्यावर वाहून गेले, तर दुसरीकडे वाहतूक व्यवस्था कोलमडली. अचानक फुटलेल्या जलवाहिनीमुळे प्रशासनाविरोधात नाराजीचा सूर उमटू लागला आहे. शनिवारी रात्री उशिरा फॉलोवर लाइन चौकात जलपुरवठा करणारी मुख्य वाहिनी फुटली. ही जलवाहिनी रस्त्याच्या मध्यभागीच असल्यामुळे काही मिनिटांतच चौक जलमय झाला. रस्त्यावर चार ते पाच फूट उंच पाणी उडत असल्याने वाहनचालकांना त्रास सहन करावा लागत होता, काही दुचाकीस्वारांना मधोमधच आपली वाहने थांबवून बाजूला सरकावे लागले. अनेकांना पर्यायी मार्गाचा अवलंब करावा लागला.

घटनास्थळी उपस्थित स्थानिक नागरिकांनी पालिकेच्या जलपुरवठा विभागावर तीव्र संताप व्यक्त केला. “दर काही महिन्यांनी जलवाहिनी फुटते, लाखो लिटर पाणी वाया जाते, पण तरीही प्रशासन गांभीर्याने घेत नाही, अशी भावना अनेकांनी व्यक्त केली. काही नागरिकांनी तर या जलवाहिनीच्या वारंवार फुटण्यामागे निकृष्ट दर्जाचे साहित्य आणि देखरेखीतील हलगर्जीचे कारण सांगितले. अखेर सकाळी वाहिनी दुरुस्त केली. वारंवार होणाऱ्या अशा घटनांमुळे लाखो लिटर पिण्याचे पाणी वाया जाणे ही गंभीर बाब आहे. त्यामुळे शहरात वारंवार फुटणाऱ्या जलवाहिनीमुळे निर्माण होणाऱ्या समस्यांवर प्रशासन कायमस्वरूपी उपाययोजना कधी करणार,” असा सवाल आता शहरवासीय विचारत आहेत.