गुणवंत विद्यार्थ्यांचा गौरव सोहळा

गुणवंत विद्यार्थ्यांचा गौरव सोहळा
जोगेश्वरी, ता. ४ (बातमीदार) ः रत्नागिरी जिल्हा मराठा ज्ञाती समाज मुंबई संस्थेच्या वतीने गुणवंत विद्यार्थ्यांचा व सदस्यांचा कौतुक सोहळा रविवारी (ता. ३) उत्साहात पार पडला. या कार्यक्रमात समाजाच्या प्रगतीस हातभार लावणाऱ्या गुणवंत सदस्यांचा आणि विविध शैक्षणिक परीक्षांमध्ये उज्‍ज्वल यश संपादन करणाऱ्या विद्यार्थ्यांचा विशेष सन्मान करण्यात आला. कार्यक्रमाची सुरुवात संस्थेचे अध्यक्ष मोतिराम विश्वासराव, कार्याध्यक्ष सहदेव सावंत, सरचिटणीस जितेंद्र पवार, समाज उत्कर्ष समितीचे अध्यक्ष सुबोध बने, संस्थेचे सल्लागार एकनाथ दळवी, प्रमोद पंडित, माजी उपकार्याध्यक्ष मनोहर कदम यांच्या हस्ते दीपप्रज्‍वलन करून झाली. या सोहळ्यात एकूण ३५ गुणवंत विद्यार्थ्यांना रोख पारितोषिक आणि पुष्पगुच्छ देऊन गौरविण्यात आले. समाजाच्या विविध क्षेत्रात उल्लेखनीय कामगिरी करणाऱ्या नऊ गुणवंत सदस्यांचा शाल आणि पुष्पगुच्छ देऊन सन्मान करण्यात आला. सुबोध बने यांनी सर्व सदस्यांनी संस्थेच्या उपक्रमात सहभागी होऊन विधायक सूचना कराव्यात असे सुचवले. कार्यक्रमाचे सूत्रसंचालन संस्थेच्या चिटणीस सुरक्षा घोसाळकर यांनी केले. आभार आरजेएमडीएस इंग्लिश स्कूलचे मुख्य कार्यकारी अधिकारी दीपक खानविलकर यांनी मानले.