कल्याण-शीळ रस्त्यावर बॅनरबाजी

कल्याण-शिळ रस्त्यावर बॅनरबाजी
दुभाजकावर
सकाळ वृत्तसेवा
डोंबिवली, ता. ४ : पालिका निवडणुकीच्या पार्श्वभूमीवर राजकीय पक्षांची मोर्चेबांधणी जोरात सुरू आहे. तसेच सण-उत्सवाच्या काळात बॅनरबाजीही करण्यात येत आहे. त्यासाठी जागा मिळवण्यासाठी राजकीय पक्षांची धडपड सुरू आहे. त्यामुळे दिसेल तिथे बॅनर लावले जात आहेत. कल्याण-शिळ रोडवरील दुभाजकावरील जागा ही बॅनरने गिळंकृत केली आहे. दुभाजकामध्ये सुशोभीकरणासाठी लावण्यात आलेल्या वस्तूंवर बॅनर लावण्यात आले आहेत. शहरातील बेकायदा फलकांवर पालिका प्रशासनाकडून जोरदार कारवाई होत असतानाच सत्ताधारी पक्षाच्या बॅनरला मात्र अभय दिले जात असल्याचे दिसून येत आहे.

स्थानिक स्वराज्य संस्थांच्या निवडणुका अवघ्या काही दिवसांवर येऊन ठेपल्या आहेत. त्यामुळे सर्वच पक्ष कामाला लागले आहेत. मतदारांना आकर्षित करण्यासाठी विविध शिबिरांचे आयोजन करण्यात येत आहे. तसेच वाढदिवस, सत्कार समारंभ यांचीही मोठ्या प्रमाणात जाहिरात करण्यात येत आहे. यासाठी शहरातील एकही मोकळी जागा सोडली जात नाही. या बेकायदा बॅनरमुळे शहराचे विद्रूपीकरण होत आहे. शहराच्या विद्रूपीकरण रोखण्यासाठी पालिका आयुक्त अभिनव गोयल यांच्या निर्देशानुसार शहरातील मुख्य तसेच अंतर्गत रस्त्यावरील बेकायदा फलक, होर्डिंग, बॅनरवर कारवाई करण्यात येत आहे. या फलकांमध्ये जास्त करून राजकीय पक्षांची बॅनरबाजी दिसून येत आहे.

कारवाईत दुजाभाव
पालिका प्रशासनाकडून यावर कारवाई करण्यात येत असली तरी त्यामध्ये दुजाभाव केला जात असल्याचे दिसून येत आहे. मनसे, राष्ट्रवादी शरद पवार गट, उद्धव ठाकरे गट यांच्या पक्षातील पदाधिकारी, कार्यकर्ते यांच्या बॅनरवर त्वरित कारवाई होऊन ते काढले जात आहेत. दुसरीकडे भाजप, शिवसेना शिंदे गट तसेच राष्ट्रवादी अजित पवार गटाच्या पदाधिकाऱ्यांच्या बॅनरला मात्र हातदेखील लावला जात नाही. ते बॅनर जसेच्या तसे शहरात दिवसेंदिवस लागलेले दिसून येतात.

शहराच्या विद्रूपीकरणात भर
कल्याण-शिळ रस्त्याचे सुशोभीकरण करण्यासाठी रस्त्याच्या मधोमध असलेल्या दुभाजकावर विविध डिझाइन असलेले स्टॅच्यू लावण्यात आले आहेत. तसेच झाडे लावून हे दुभाजक सुशोभित करण्यात आले आहेत. मात्र या स्टॅच्यूचाच आधार घेत भाजपच्या पदाधिकाऱ्यांनी आपल्या नेत्याला शुभेच्छा देणारे बॅनर त्याच्यावर लावले आहेत. हे बॅनर विद्रूपीकरणात भर घालत आहेत. जागोजागी हे बॅनर लागले असून, याकडे पालिकेचे लक्ष जात नसल्यामुळे आश्चर्य व्यक्त केले जात आहे. पालिका का प्रशासनाला हे बॅनर कधी दिसतात आणि हे दुभाजक बॅनरपासून कधी मुक्त होतात, याकडे नागरिकांचे लक्ष लागले आहे.