नवी मुंबईतील स्पीड ब्रेकर धोकदायक स्थितीत

गतिरोधक नव्हे प्राणरोधक
नवी मुंबईतील गतिरोधक धोकादायक स्थितीत; अपघातांना निमंत्रण
वाशी, ता. ४ (बातमीदार) ः नवी मुंबई शहरातील बहुतेक रस्त्यांचे काँक्रीटीकरण करण्यात आलेले आहे. पण, या रस्त्यावर मात्र डांबरांचे गतिरोधक बनविण्यात आलेले आहेत. या गतिरोधकाची अवस्था दयनीय झाली असून, यामुळे अपघाताला निमंत्रण मिळत आहे.
नवी मुंबईत बहुतेक रस्त्यांचे पालिकेकडून काँक्रीटीकरण करण्यात आलेले आहे, पण या रस्त्यावर वाहनांच्या वेगाला आवार घालण्यासाठी डांबरांचे गतिरोधक बांधण्यात आले आहे, पण पावसामुळे आणि अवजड वाहनांचा वाहतुकीचा वेग कमी करताना होत असणाऱ्या घर्षणामुळे या गतिरोधकाची दुर्दशा झाली असून, त्यावरच खड्डे पडले आहेत. त्यामुळे या गतिरोधकावर वाहनांचे अपघात देखील होत आहे. आधीच रस्त्यांवरील खड्ड्यांमुळे वाहनचालकांची हाडे पुरती खिळखिळी होत आहेत. त्यातच आता रस्त्यावर गतिरोधकांवरही खड्डे पडले आहेत.
ठाणे-बेलापूर मार्गासह एमआयडीसीतील रस्ते, शहरातील अंतर्गत रस्त्यावर असणारे गतिरोधकाचीही हीच अवस्था झालेली आहे, तर गतिरोधकावर सुरक्षिततेचा उपाय म्हणून रिफ्लेक्टरही बसविले गेले नाहीत, तर गतिरोधक दिसण्यासाठी त्यावर पिवळे पांढरे पट्टेदेखील गायब झाले आहेत. त्यामुळे रात्रीच्या वेळेस गतिरोधक दिसत नसल्यामुळे वाहन आदळून अपघात होण्याच्या घटनादेखील घडल्या आहेत.

वाहने आदळतात
गतिरोधकांचे उंचीचे प्रमाण ठरवून दिलेले असतानाही या नियमांना हरताळ फासला जातो. त्यामुळे गतिरोधकावर वाहनचालकांचे वाहने आदळत असल्याने वाहनचालकांचे कंबरडे मोडत आहे. त्यामुळे हे गतिरोधक आपल्या आरोग्यास घातक असून, यामुळे मणक्याचे आजार होत आहेत.

नियमांचा विसर
विशेष म्हणजे नियमानुसार ज्या ठिकाणी गतिरोधक आहेत, त्या ठिकाणी उजव्या व डाव्या बाजूला गतिरोधक आहे, असा फलक लावणे अनिवार्य आहे. वाहनचालकांना गतिरोधक ओळखू येण्यासाठी त्यावर झेब्रा क्रॉसिंगप्रमाणे पट्टेरी रंग देणेही बंधनकारक आहे, असे असताना नवी मुंबईत या नियमांचा विसर पडलेला दिसतो.

गतिरोधकावर पांढरे पट्टे नसल्यामुळे दुचाकी चालवत असताना ते दिसत नाही. त्यामुळे गतिरोधकावरून गाडी उंच उडण्याचा प्रकार घडतात. त्यामुळे अपघात होण्याचीदेखील शक्यता असते.
- अमोल माने, दुचाकी वाहनचालक

ज्या ठिकाणी गतिरोधकाची दयनीय अवस्था झालेली आहे, त्यांची दुरुस्ती करण्यात येईल. पिवळे पांढरे पट्टे गायब झाले आहेत, त्या ठिकाणी ते मारण्यात येतील.
- शिरीष आरदवाड, शहर अभियंता