जनगणना होताच कल्याण जिल्हा स्वतंत्र होईल

जनगणना होताच कल्याण जिल्हा स्वतंत्र होईल
आमदार किसन कथोरे यांचे प्रतिपादन
सकाळ वृत्तसेवा
डोंबिवली, ता. ४ : कल्याण जिल्हा स्वतंत्र व्हावा, ही आमची पहिल्यापासूनची मागणी आहे. आता जनगणना सुरू होईल, त्यानंतर कल्याण जिल्हा शंभर टक्के स्वतंत्र होईल. मुख्यमंत्री देवेंद्र फडणवीस यांनी तसा शब्द दिला आहे. जोपर्यंत जिल्हा स्वतंत्र होत नाही, तोपर्यंत मी गप्प बसणार नाही, असे वक्तव्य आमदार किसन कथोरे यांनी कल्याण येथे केले.

कल्याण कृषी उत्त्पन्न बाजर समितीमधील रस्त्याचे सिमेंट काँक्रीटीकरण कामाचा सोमवारी (ता. ४) भूमिपूजन सोहळा पार पडला. आमदार कथोरे यांच्या हस्ते या कामाचे भूमिपूजन करण्यात आले. या वेळी आमदार कथोरे म्हणाले, कल्याण कृषी उत्पन्न बाजार समिती शेतकरी व्यापारी यांची वर्दळ असते; मात्र येथे रस्त्यांची सुविधा नाही. सगळीकडे घाणीचे साम्राज्य पसरले आहे. निवडणुकीच्या काळात येथे आलो होतो. व्यापाऱ्यांना त्या वेळी येथील रस्ते नीट करून देण्याचे आवाहन केले होते. येथे घाणीच्या साम्राज्यात व्यापाऱ्यांनी व्यवसाय करणे हे मला पटले नव्हते. उर्वरित काम वेगळ्या पद्धतीने करून कृषी उत्पन्न बाजार समिती एक मॉडेल कृषी उत्पन्न कशी होईल, याचे नियोजन करण्याचा आम्ही प्रयत्न करत आहोत, असे कथोरे म्हणाले.

प्रसिद्धी माध्यमांशी बोलताना आमदार कथोरे यांनी स्वतंत्र कल्याण जिल्ह्याच्या मागणीबाबत अधिवेशनात अर्धा तास याविषयी चर्चा झाल्याचे सांगितले. कल्याण हा जिल्हा झालाच पाहिजे. जोपर्यंत जिल्हा होत नाही, तोपर्यंत मी गप्प बसणार नाही. कोणत्याही परिस्थितीत जनगणना आता सुरू होत आहे. जनगणनेनंतर कल्याण जिल्हा हा शंभर टक्के होईल, तसाच शब्द मुख्यमंत्र्यांनी आम्हाला दिला आहे.

स्थानिक निवडणुकांमध्ये मैत्रीपूर्ण लढत देणार
महापालिका नगरपालिका यांच्या निवडणुका येऊ घातल्या आहेत. या निवडणुकांमध्ये स्वतंत्र निवडणूक लढण्याविषयी वरिष्ठांकडून म्हटले जात आहे. याविषयी आमदार कथोरे म्हणाले, भाजपची ताकद मोठी असल्यामुळे जे आमच्या अध्यक्षांनी सूचित केले आहे, त्या धर्तीवर आम्हाला चालावे लागेल. बदलापूर पालिकेत नगराध्यक्ष बसवणार यात काही शंका नाही. राज्यात आम्ही एकत्र आहोत, त्यामुळे युतीला प्राधान्य असेल; मात्र स्थानिक पातळीवर कार्यकर्ते यांच्यात काही मतभेद असतील तर मैत्रीपूर्व लढत तेथे करू, असे सूतोवाच आमदारांनी दिले.