मैत्रीदिनीच अपघातात मैत्रिणीचा मृत्यू

मैत्रीदिनी मैत्रिणीचा अपघातात मृत्यू
सकाळ वृत्तसेवा
ठाणे, ता. ४ : मैत्री दिनानिमित्त रात्रीचे जेवण झाल्यानंतर मैत्रिणीला घरी सोडायला जात असताना मुंब्रा बायपासच्या रेतीबंदर नंबर ४ येथे एका कंटेनरने दुचाकीला पाठीमागून जोरदार धडक दिली. या धडकेत मैत्रिणीचा जागीच मृत्यू झाला असून मित्रही जखमी झाला आहे. ही घटना रविवारी (ता.३) रात्री साडेअकराच्या समोर आली. याप्रकरणी कंटेनर चालकाविरोधात गुन्हा दाखल केला आहे.
तक्रारदार पवनकुमार मैसाला (२४) हा पाचपाखाडी येथे राहत असून रविवारी मैत्री दिन असल्याने पवनकुमार हा तीन हात नाका येथील पलक सोळंकी (२१) आणि मुंब्रा येथील झोया या दोन मैत्रिणींसह तुळशीधाम येथे जेवण करण्यासाठी गेला होता. जेवण झाल्यानंतर ते तिघे दुचाकीवरून मुंब्र्यात गेले. तेथे झोयाला घरी सोडून दोघे येत असताना मुंब्रा बायपास उड्डाणपुलाच्या पुढील रेतीबंदर नंबर ४ येथे येताच पाठीमागून भरधाव वेगाने आलेल्या कंटेनरने त्यांच्या दुचाकीला धडक दिली. यामध्ये ते दोघे खाली जमिनीवर पडले. याचदरम्यान कंटेनरचे चाक पलक हिच्या डोक्यावरून गेल्याने तिचा जागीच मृत्यू झाला. तसेच पवनच्या कमरेला, डाव्या कुशीला मुका मार लागला असून उजव्या पायाच्या गोठा फॅक्चर झाला आहे. याप्रकरणी मुंब्रा पोलिस ठाण्यात गुन्हा दाखल केला असून वरिष्ठ पोलिस निरीक्षक अनिल शिंदे यांच्या मार्गदर्शनाखाली पुढील तपास सुरू आहे.