गाळ न उचलता घनकचरा विभागाची ''कमिशनची सफाई''!

कापूरबावडीत नाल्याच्या गाळाचा डोंगर
झाडी- झुडपे उगवले, दुर्गंधीने आजाराला निमंत्रण
कमिशनच्या सफाईत दिरंगाईचा काँग्रेसचा आरोप
सकाळ वृत्तसेवा
ठाणे, ता. ४ : पावसाळापूर्व झालेल्या नालेसफाईचा कचरा आणि गाळ ४८ तासांत उचलणे बंधनकारक आहे. असे असताना आता कापुरबावडी नाल्याजवळ दोन महिने झाले तरी गाळ-कचऱ्याचा डोंगर तसाच असल्याची बाब उघडकीस आली आहे. या कचऱ्यामुळे परिसरात दुर्गंधी पसरून आजाराला निमंत्रण मिळत आहे. धक्कादायक म्हणजे या कचऱ्याच्या डोंगरावर आता झाडी-झुडपीही उगवली असताना पालिकेचे याकडे सपशेल दुर्लक्ष होत आहे. संबंधित ठेकेदारावर कारवाई करणे सोडाच पण घनकचरा विभाग कमिशनच्या सफाईत व्यस्त असल्याचा आरोप करत काँग्रेसने संताप व्यक्त केला आहे.
ठाणे पालिका क्षेत्रातील नालेसफाईची कामे पालिका प्रशासनाकडून पावसाळ्यापूर्वी हाती घेण्यात येत असतात. त्यानुसार यंदाच्या वर्षी देखील एप्रिल महिन्यातच नाले सफाईच्या कामांच्या संदर्भातील हालचाली सुरु करण्यात आल्या होत्या. निविदा प्रक्रिया राबविणे, ठेकेदार निश्चिती करणे यामुळे यंदा पावसाळ्यापूर्वी नालेसफाई पूर्ण करण्याचा पालिकेच्या घनकचरा विभागाचा मानस होता. त्यानुसार नाले सफाई झाल्याचा दावा देखील करण्यात आला. कापुरबावडी नाका येथे असलेल्या झोपडपट्टी वसाहतीतून जाणाऱ्या मोठया नाल्याचीही ठेकेदारामार्फत सफाई करण्यात आली. मात्र, त्याने नाल्यातून काढलेला गाळ काठावर ठेवला आणि तो दोन महिने उलटले तरी उचलला नसल्याचा आरोप काँग्रेसचे प्रवक्ते राहुल पिंगळे यांनी केला आहे.
या ठिकाणी १० फुटाहून अधिक उंच आणि ३० फुटाहून अधिक रुंद गाळाचा डोंगर तयार झाला आहे. नियमानुसार नाल्यामधून बाहेर काढलेला हा गाळ जास्तीत जास्त ४८ तासात उचलून घेऊन जाणे ठेकेदाराला बंधनकारक आहे. मात्र, घनकचरा विभागाच्या आशीर्वादाने हा गाळ दोन महिने उलटून गेले तरी उचलण्यात आलेला नाही. गेल्या दोन महिन्यांपासून येथील रहिवाशांना या गाळाच्या दुर्गंधीचा सामना करावा लागत आहे. गाळाची घाण रस्त्यावर पसरली असून येथील रहिवाशांवर मोठ्या प्रमाणात डासांचा हल्ला होण्याच्या तक्रारी आहेत.

ढिगारा जैसे थे
दोन महिन्यांपूर्वी सुद्धा राहुल पिंगळे या ठिकाणी नाल्यामधून काढलेल्या गाळाची पाहणी करून गेले होते. त्यानंतर रहिवाशांच्या तक्रारी आल्यानंतर पुन्हा रविवारी (ता. ३) पाहाणी केली असता दुर्गंधी पसरविणाऱ्या गाळाचा ढीग जैसे थे असल्याचे दिसून आले असल्याची माहिती राहुल पिंगळे यांनी दिली.

प्रशासनाची डोळेझाक
ठेकेदाराला वाचवण्यासाठी अधिकाऱ्यांनी डोळेझाक केली असून, याला प्रशासनाचा थेट आशीर्वाद असल्याचा गंभीर आरोप राहुल पिंगळे यांनी केला. तसेच, सणांच्या पार्श्वभूमीवर परिसरात निर्माण झालेली आरोग्य स्थिती चिंता निर्माण करणारी आहे. सणांच्या तोंडावर घाण आणि रोगराई वाढत असताना पालिका झोपेत आहे. ठेकेदारावर दंड आणि काळ्या यादीची कारवाई झालीच पाहिजे, अशी मागणी राहुल पिंगळे यांनी केली.