खड्डेमुक्तीचा दावा फोल

खड्डेमुक्तीचा दावा फोल
उपमुख्यमंत्री एकनाथ शिंदे यांनी व्यक्त केला संताप
सकाळ वृत्तसेवा
ठाणे, ता. ४ : वाहतूक कोंडीने ठाणेकरांना छळले असून, प्रशासनाचा खड्डेमुक्तीचा दावा खोल ठरला आहे. याचा अनुभव उपमुख्यमंत्री एकनाथ शिंदे यांना आल्यानंतर त्यांनी सोमवारी (ता. ४) तातडीने सर्व संबंधित अधिकाऱ्यांची बैठक घेत संताप व्यक्त केला. सर्व यंत्रणांनी समन्वय साधून हा परिसर वाहतूक कोंडीमुक्त करावा. तसेच रस्ते तातडीने दुरुस्त करून खड्डेमुक्तीसाठी उपलब्ध असलेले उत्तम तंत्रज्ञान वापरावे, असे निर्देश उपमुख्यमंत्री एकनाथ शिंदे यांनी दिले.

ठाण्यात कोपरी, माजिवडा यासोबत घोडबंदर रस्ता, गायमुख घाट ते फाउंटन हॉटेल, शिळफाटा परिसर येथे सकाळी आणि संध्याकाळी गर्दीच्या वेळी होत असलेल्या वाहतूक कोंडीमुळे नागरिक प्रचंड त्रस्त झाले आहेत. त्याबद्दलच्या तक्रारी वारंवार येत असून, सर्व यंत्रणांनी समन्वय साधून हा पूर्ण परिसर वाहतूक कोंडीमुक्त करावा, असे निर्देश उपमुख्यमंत्री एकनाथ शिंदे यांनी सोमवारी वरिष्ठ अधिकाऱ्यांशी झालेल्या बैठकीत दिले. या वेळी वाहतूक कोंडीची समस्या सोडवण्यात येत असलेल्या अपयशाबद्दल स्पष्ट शब्दात नाराजी व्यक्त केली.

बैठकीस ठाण्याचे जिल्हाधिकारी डॉ. श्रीकृष्णनाथ पांचाळ, ठाणे महानगरपालिका आयुक्त सौरभ राव, पोलिस आयुक्त आशुतोष डुंबरे, वाहतूक पोलिस उपायुक्त पंकज शिरसाट आदी अधिकारी उपस्थित होते. सार्वजनिक बांधकाम विभागाचे अधीक्षक अभियंता सिद्धार्थ तांबे यांना दूरध्वनीद्वारे सूचना दिल्या. या वेळी गायमुख घाटातील रस्त्यामुळे वाहतूक कोंडी सातत्याने होत असून, या समस्येवर अजूनही तोडगा काढण्यात यश आलेले नाही. याबद्दल उपमुख्यमंत्री एकनाथ शिंदे यांनी नाराजी व्यक्त केली. वाहतुकीचे व्यवस्थित नियोजन करून ठाणे, भिवंडी, शिळफाटा आणि कोपरी या चारही भागातील वाहतूक कोंडीवर मात करावी. रस्ते दुरुस्ती करताना त्या कामाचा दर्जा चांगला असावा. रस्त्यावर दुरुस्तीचे उंचवटे तयार होऊ नयेत. त्याने अपघात होतात, याकडे कटाक्षाने लक्ष द्यावे. खड्डेमुक्ती झाल्यास वाहतूक सुरळीत होण्यास मदत होईल. त्यामुळे उपलब्ध असलेले उत्तम तंत्रज्ञान वापरून खड्डे मुक्ती करावी, असेही उपमुख्यमंत्री शिंदे यांनी स्पष्ट केले.