अकरावीच्या व्यवस्थापन कोट्यासाठी अनागोंदी न्यायालयासह स्वत:च्याच नियमांना विभागाकडून हरताळ

अकरावीच्या व्यवस्थापन कोट्यामध्ये अनागोंदी
नियमांना हरताळ; जागा ठेवल्या अडवून

संजीव भागवत ः सकाळ वृत्तसेवा

मुंबई, ता. ४ ः अकरावी ऑनलाइन प्रवेश प्रक्रियेत केवळ संस्थाचालकांचे हित जोपासण्यासाठी विभागाकडून न्यायालयाच्या आणि स्वतः काढलेल्या आदेशाला हरताळ फासला जात आहे. या प्रवेश प्रक्रियेत व्यवस्थापन कोट्यातील जागा प्रत्यार्पित करण्यासाठी तिसऱ्या फेरीपर्यंतची समर्पित करण्याचे विभागाचेच आदेश असताना आपल्या आदेशाला संस्थाचालकांसाठी केराच्या टोपलीत टाकून पाचव्या ओपन टू ऑल फेरीचे प्रवेश सुरू ठेवण्यात आल्याची धक्कादायक माहिती समोर आली आहे.
यंदाच्या शैक्षणिक वर्षातील अकरावी ऑनलाइन प्रवेश प्रक्रियेत अल्पसंख्याक, व्यवस्थापन, इन-हाउस या तीनही कोट्यांसाठी जागा निश्चित करण्यात आल्या होत्या. त्यात व्यवस्थापनच्या जागा तिसऱ्या फेरीनंतर समर्पित करण्याचे आदेश विभागाने ६ मे रोजी काढलेल्या शासन निर्णयातून देण्यात आले होते, मात्र अकरावीच्या चार फेऱ्यांपर्यंत बहुतांश नामांकित महाविद्यालयांनी आपल्याकडील व्यवस्थापन कोट्यातील जागा समर्पित केल्या नाहीत. यामुळे आता पाचव्या ओपन टू ऑल या फेरीतून बेकायदा भरण्यासाठी उपलब्ध असल्याने, यातून सर्वोच्च न्यायालय आणि शिक्षण विभागाच्या आपल्याच आदेशाला हरताळ फासला जात असल्याचे शिक्षणतज्ज्ञ राजेंद्र धारणकर यांनी सांगितले.
व्यवस्थापन कोट्यातील जागा तिसऱ्या फेरीनंतरही भरल्या जात नसतील, तर त्या ऑनलाइनसाठी समर्पित करण्यासाठी नियम आहेत. या जागा संबंधित महाविद्यालयांनी समर्पित करून घेण्याची जबाबदारी विभागाची होती. विभागाकडून संस्थाचालकांची पाठराखण केली गेल्याने त्या पाचव्या फेरीतही प्रवेशासाठी दिसत असल्याचे विद्यार्थी-पालक संघटनेचे प्रवीण यादव यांनी सांगितले.
...
समर्पित न केलेल्या सात हजार जागा
मुंबई, पुण्यातील महाविद्यालयांमध्ये सध्या सुरू असलेल्या फेरीसाठी व्यवस्थापनाच्या जागांची महाविद्यालयांच्या नावांसह आकडेवारीची यादीच ‘सकाळ’कडे उपलब्ध झाली असून, यात एकट्या मुंबईतील ७७७ महाविद्यालयांकडे समर्पित न केलेल्या व्यवस्थापनाच्या सात हजार १० जागा आहेत.
...
स्वत:च्याच नियमांचे पालन न करता केवळ संस्थाचालकांचे हित साधण्याचा हा प्रकार आहे. तिसऱ्या फेरीनंतर संस्थाचालकांनी त्या जागा का अडवून ठेवल्या, याची चौकशी होण्याची गरज आहे. शिक्षण विभागाचे महाविद्यालये ऐकत नाहीत, ते बेकायदा प्रवेश करत आहेत, असे यातून दिसून येते.
- वैशाली बाफना, सिस्कॉम, शिक्षण प्रमुख
...
व्यवस्थापन कोट्यातील प्रवेशासाठी शासनाने एका पत्रानुसार मंजुरी दिली होती. त्यामुळे त्या जागा या फेरीत प्रवेशासाठी त्या-त्या कोट्यातून दिसत आहेत.
- डॉ. श्रीराम पानझडे, सहसंचालक, शिक्षण संचालनालय
...
मुंबईतील व्यवस्थापनाच्या जागा
शाखा एकूण जागा रिक्त असलेल्या जागा
कला ११,१८० ७३३
वाणिज्य ५८,९१२ ४,०९८
विज्ञान ३०,०६७ २,१७९
एकूण १,००,१५९ ७,०१०