जैन बांधवांचा आक्रमक पवित्रा

१० ऑगस्टपासून उपोषण; जैन बांधवांचा आक्रमक पवित्रा
सकाळ वृत्तसेवा
मुंबई, ता. ४ : दादर येथील कबुतरखान्यावर शनिवारी (ता. २) महापालिकेने कारवाई केली. याविरोधात जैन बांधवांनी आक्रमक पवित्रा घेतला आहे. बंदिस्त केलेला कबुतरखाना उघडा करून कारवाई न थांबवल्यास येत्या १० ऑगस्टपासून जैन मुनींसह शेकडो कार्यकर्त्यांनी उपोषणाला बसण्याचा निर्णय घेतल्याची माहिती स्थानिक माजी नगरसेवक पूरण दोशी यांनी दिली.

कबुतरखाना दादर रेल्वे स्थानकाजवळ असून, तो वाहतुकीसही अडथळा ठरत आहे. शिवाय कबुतरांच्या विष्ठेमुळे बाजूच्या रहिवाशांच्या आरोग्यासही धोका निर्माण झाला आहे. त्यामुळे कबुतरखाना हटवण्याची मागणी होत आहे. पालिकेने शनिवारी कबुतरखाना बंदिस्त करून कारवाई केल्यानंतर जैन समाजाने रविवारी (ता. ३) शांतिदूत यात्रा काढून निषेध व्यक्त केला. तसेच पालिकेने कबुतरखाना सुरू न केल्यास येत्या १० ऑक्टोबरपासून जैन मुनींसह शेकडो बांधवांनी दादर येथे उपोषणाला बसण्याचा निर्णय घेतला आहे. दरम्यान, ७ ऑगस्टला न्यायालयात याबाबत सुनावणी आहे. या दिवशी काय निर्णय होतो त्याची प्रतीक्षा असल्याचे माजी नगरसेवक पूरण दोशी यांनी सांगितले.

..
ब्रिटिशकालीन वारसा
दादरच्या या कबुतरखान्याला ब्रिटिशकालीन वारसा असून, १९३३मध्ये पाण्याचा कारंजा म्हणून त्याची निर्मिती झाली होती. कालांतराने येथे कबुतरांना दाणे टाकण्याचा प्रकार सुरू झाला आणि या जागेचे कबुतरखान्यात रूपांतर झाले. मात्र इथे जमणाऱ्या कबुतरांच्या थव्यामुळे विष्ठा, पिसे आणि दाण्यांमुळे परिसरात अस्वच्छता आणि श्वसनविकारांसारख्या आरोग्य समस्यांचा धोका वाढला आहे. त्यामुळे रहिवाशांची कबुतरखाना हटवण्याची मागणी केली जाते आहे.