अभियांत्रिकीच्या पहिल्या कॅप फेरीत केवळ ३२ हजार ६३५ प्रवेश

अभियांत्रिकीच्या पहिल्या कॅप फेरीत केवळ ३२ हजार ६३५ प्रवेश
मुंबई, ता. ४ : तंत्रशिक्षण संचालनालयांच्या अंतर्गत येणाऱ्या राज्यातील अभियांत्रिकी (बी. ई./बी. टेक.) महाविद्यालयातील पदवी अभ्यासक्रमांच्या पहिल्या कॅप फेरीत एक लाख ४४ हजार ७७६ विद्यार्थ्यांना प्रवेश अलोट झाल्यानंतर त्यातील केवळ ३२ हजार ६३५ विद्यार्थ्यांनी प्रवेश घेतल्याची माहिती सीईटी सेलकडून देण्यात आली.

अभियांत्रिकीच्या पहिल्या कॅप फेरीत १५ हजार ८५२ जणांना त्यांच्या पहिल्या पसंतीक्रमांची महाविद्यालये मिळाली होती, तर सीईटी सेलकडून ४ ऑगस्टपर्यंत या प्रवेशाला मुदत देण्यात आली होती. या मुदतीत एकूण प्रवेश निश्चित झालेल्या विद्यार्थ्यांपैकी या फेरीत ३२ हजार ६३५ विद्यार्थ्यांनी प्रवेश घेतले असून, उर्वरित रिक्त राहिलेल्या एक लाख १२ हजार १४१ जागा आता दुसऱ्या कॅप फेरीत प्रवेशासाठी उपलब्ध होणार आहेत. अभियांत्रिकीची दुसरी कॅप फेरीतील प्रवेशासाठी ५ ते ७ ऑगस्ट उमेदवारांनी नवीन पसंतीक्रम भरायचे आहेत. त्यानंतर ११ ऑगस्ट रोजी दुसऱ्या फेरीची प्रवेश यादी जाहीर होईल. त्यानंतर १२ ते १४ ऑगस्ट यादरम्यान विद्यार्थ्यांना बेटरमेंट, फ्रीझ पर्याय निवड आदी पर्याय उपलब्ध होतील, त्यानंतर १२ ते १४ ऑगस्ट या कालावधीत प्रवेश अलोट झाल्यानंतर विद्यार्थ्यांना संबंधित महाविद्यालयात प्रत्यक्ष जाऊन आपले प्रवेश करण्यासाठी कागदपत्रे जमा करावी लागतील.