दहीहंडी फोडण्यासाठी मुलींचा पुढाकार

दहीहंडी फोडण्यासाठी मुलींचा पुढाकार
वसई-विरारमध्ये वेगवेगळ्या गटांचा सराव

वसई, ता. ५ (बातमीदार) : साहसी खेळात समाविष्ट केलेल्या दहीहंडी उत्सवासाठी गोविंदा पथकांचा वसई विरार शहरात सराव सुरू झाला आहे. एकावर एक हंडी रचत पथकाकडून सराव केला जात आहे. यामध्ये मुलींचाही पुढाकार मोठ्या प्रमाणात दिसत आहे. वसई-विरार शहर महापालिकेने अपघाती विमा संरक्षण कवच गोविंदा पथकाला दिले असून, गोविंदा पथकाकडून नोंदणी केली जात आहे.
जन्माष्टमी व दहीहंडी उत्सव तालुक्यात आनंदाने साजरा केला जातो. श्रीकृष्ण जन्मोत्सव व त्यानंतर दुसऱ्या शनिवारी (ता. १६) दहीहंडीचा उत्सव होणार आहे. त्यामुळे विविध ठिकाणी कार्यक्रमाचे आयोजन करण्यात आले आहे. यानिमित्ताने मुलांच्या गोविंदा पथकाच्या खांद्याला खांदा लावून दहीहंडीत मुलींचाही सहभाग उल्लेखनीय दिसत आहे.
वसईच्या दिवाणमान मित्रमंडळाकडून घेण्यात येणाऱ्या सरावप्रसंगी वसई तालुक्यातील कामण, वसई फाटा, चांदीप, खानिवडे, सातिवली, तुंगार फाटा यासह अन्य विभागातून मुले व मुलींचा सराव सुरू आहे.

-----------
यंदा पथकाचे तेरावे वर्ष आहे. विविध भागांतून मुली अधिक प्रमाणात सरावासाठी येत आहेत. आमच्या मंडळाकडून नाना नानी पार्क उद्यानात सराव केला जात आहे. गोविंदा पथकांनी महापालिकेच्या अपघाती विमा संरक्षणाचा लाभ घ्यावा, जेणेकरून प्रत्येक गोविंदा हा सुरक्षित राहील.
- महेंद्र मानकर, अध्यक्ष, दिवाणमान मित्रमंडळ, वसई
----------------
वसई : पश्चिमेकडील नाना नानी पार्क येथे सराव करताना गोविंदा पथक
- महेंद्र मानकर प्रतिक्रिया फोटो.