कृषी केंद्रात खतांचा तुटवडा

कृषी केंद्रात खतांचा तुटवडा
पोयनाडसह खारेपाटातील शेतकरी त्रस्त
पोयनाड, ता. ५ (बातमीदार) : अलिबाग तालुक्यातील पोयनाड परिसरात पाऊस चांगला असल्याने शेतीची कामे अंतिम टप्प्यात आली आहेत. अशातच महिन्याभरापासून पोयनाडसह कुर्डुस, शहापूर येथील कृषी सेवा केंद्रात युरिया खत उपलब्ध नसल्याने शेतकऱ्यांना विविध अडचणींचा सामना करावा लागत आहे.
खारेपाट विभागात शेती हेच उत्पनाचे साधन आहे. यंदा पाऊस चांगला झाल्याने भाताचे पीक बहरले आहे; पण पोयनाड परिसरातील कृषी सेवा केंद्रात युरिया खताचा तुटवडा आहे. आठवडाभरापासून खताच्या शोधासाठी शेतकऱ्यांना धावाधाव करावी लागत आहे. तर अनेक शेतकऱ्यांना अलिबाग, खंडाळे, मानीफाटा येथून चढ्या भावाने खत खरेदी करावी लागत आहे. त्यामुळे वेळ आणि पैसाही वाया जात असल्याने शेतकऱ्यांमध्ये नाराजी आहे.
-------------------------------
शेती नापीक होण्याची भीती
पोयनाड विभाग तसेच खारेपाटातील शेतकऱ्यांना तत्काळ युरिया खत उपलब्ध करून देण्याची मागणी रायगड जिल्हाप्रमुख राजा केणी यांनी कृषी अधीक्षकांना पत्र पाठवून केली आहे. तसेच खत उपलब्ध नसल्याने शेती नापीक होण्याची भीती वर्तवली आहे.