हुतात्मा स्मारकाचा कोंडमारा

भगवान खैरनार : सकाळ वृत्तसेवा
मोखाडा, ता. ५ : आजच्या पिढीला हुतात्म्यांच्या बलिदनाची माहिती व्हावी, म्हणून १९८४ मध्ये हुतात्मा स्मारकांची निर्मिती तत्कालीन सरकारने केली. मोखाड्यातही हुतात्मा वीर सखाराम खरोटे यांचे बस स्थानकाशेजारी हुतात्मा स्मारक बांधण्यात आले, मात्र शहराची शान असलेल्या या स्मारकाच्या समोरच आता पालघर जिल्हा परिषदेच्या बांधकाम विभागाने व्यापारी गाळे बांधण्याचे काम हाती घेतले आहे. तर पुढच्या बाजुला प्रवासी वाहतूक करणारे वाहने उभी असतात. त्यामुळे हुतात्मा स्मारकाचा श्वास कोंडल्याने त्याचा कोंडमारा झाला असून त्याचे पावित्र्य धोक्यात आले आहे.

तत्कालीन मुख्यमंत्री बॅरिस्टर ए. आर. अंतुले यांनी १९८४ मध्ये हुतात्मा स्मारकाची निर्मिती केली. या स्मारकांना अतिशय महत्त्व असून स्वातंत्र्यदिनी, प्रजासत्ताक दिन आणि महाराष्ट्र दिनी येथे झेंडावंदन करण्यात येते. यापूर्वी स्मारकाची दुरुस्ती आणि सुशोभीकरण करून नवी झळाळी देण्यात आली होती, मात्र मोखाड्यातील हुतात्मा स्मारकाच्या समोरच जिल्हा परिषदेच्या बांधकाम विभागाने व्यापारी गाळे बांधण्याचे काम हाती घेतले आहे. पर्यायाने येथे दुकानदारी वाढून व्यावसायिकांमुळे या पवित्र वास्तूच्या समोर घाण होऊन स्मारकाचे पावित्र्य धोक्यात येण्याची शक्यता आहे. त्यामुळे व्यापारी गाळ्यांचे बांधकाम त्वरित थांबवून ते जमीनदोस्त करण्याची मागणी माजी आमदार सुनील भुसारा यांनी केली आहे.

या स्मारकात वाचनालय आणि नागरिकांना बसण्यासाठी, ज्येष्ठांना फिरण्यासाठी सुसज्ज व्यवस्थापन केले होते, मात्र मध्यंतरी दुर्लक्ष झाल्यानंतर भिकारी, गर्दुल्याचे हे ठिकाण झाले होते. काही वर्षांपूर्वी दुरुस्ती झाल्यामुळे या स्मारकाचे रुपडे पालटून सुसज्ज व देखणे झाले. याठिकाणी उद्यान, लहान मुलांसाठी खेळणी अशा प्रकारचे विकास काम करून शहराच्या सौंदर्यात भर पाडता आली असती, मात्र बांधकाम विभागाने एक कोटींचा निधी मंजूर केला. त्यामधील ८० लाखांचे १४ व्यापारी गाळे बांधून स्मारकाचे विद्रूपीकरण केले गेले आहे.

जिल्हा परिषद बांधकाम विभागाचे उप अभियंता अजय गायकवाड यांनी सांगितले की, विकासात्मक सुधारणा करण्यासाठी एक कोटींपैकी २० लाखांचे सुशोभीकरण आणि ८० लाखांतून गाळ्यांचे बांधकाम करण्यात येत आहे. बहुतांश गाळ्यांचे बांधकाम पूर्णदेखील झाले आहे.

व्यापारी गाळे बांधून त्यातून उत्पन्न कमावणे गैर नाही, मात्र हुतात्मा स्मारकाची जागा घेऊन त्याची विटंबना करून भाडे मिळवण्याची वेळ जिल्हा परिषदेवर येत असल्याचे आश्र्चर्य वाटते. मुख्य कार्यकारी अधिकारी, कार्यकारी अभियंता, तसेच उप अभियंता यांच्याकडे तक्रार केली आहे. हुतात्मा स्मारकाचा श्वास कोणत्याही परिस्थितीत कोंडला जाऊ नये, अशी आमची भूमिका आहे.
- सुनील भुसारा, माजी आमदार