कांदा, लसूणच्या दरात घसरण

कांदा, लसणाचा बाजार उठला
आवक असताना भावात घसरण, ग्राहकांची पाठ
नवी मुंबई, ता. ५ (वार्ताहर)ः कांदा, लसणाशिवाय जेवणाला रुचकर स्वाद येत नाही. अशातच बाजारपेठेत चांगल्या दर्जाचा कांदा, लसणाची आवक मोठ्या प्रमाणात सुरू आहे; पण विक्री कमी होत असल्याने भाव गडगडले आहेत.
महाराष्ट्रात मध्य प्रदेश, गुजरातमधून लसणाची आवक होते. देशी लसूण चविष्ट असल्याने ग्राहकांकडून त्याला सर्वाधिक मागणी असते; पण लसणाचे भाव ८० ते १२० किलोपर्यंत आले आहे. गेल्या वर्षी हेच भाव चारशेच्या घरात होते. तर कांद्याची आवकही जास्त असल्याने भावात घसरण झाली आहे. महिनाभरापूर्वी २० रुपयांपर्यंत असणारा कांदा सध्या १३ ते १५ रुपये किलोने विकला जात आहे. तर किरकोळ बाजारात १८ ते २२ रुपये किलोने त्याची विक्री होत आहे. श्रावण सुरू असताना घरगुती तसेच हॉटेलांमध्ये कांद्याला मागणी कमी आहे. त्यामुळे हा भाव किती दिवस राहील, हे सांगता येणार नसल्याचे विक्रेत्यांचे म्हणणे आहे.
------------------------------------
कांदा, लसणाच्या भावात घट झालेली आहे. गेल्या वर्षी ऑगस्टमध्ये लसणाचा भाव प्रतिकिलो ४०० रुपयांपर्यंत गेला होता; मात्र यंदा निम्म्यापेक्षा कमी झाला आहे. भाव घसरले असले तरी ग्राहक मात्र कमीच आहेत.
- के. डी. भाळके, व्यापारी